"حملة ممنهجة".. عزيز الشافعي يرد على حملات تشويه أغانيه مع شيرين وحماقي

حرص الشاعر والملحن عزيز الشافعي على الرد على الهجوم الذي تعرض له خلال الأسابيع الماضية، بعد طرحه 3 أغانٍ مع الفنانة شيرين عبدالوهاب، والتي كان آخرها أغنية «بحرية» مع الفنان محمد حماقي.

أول تعليق من عزيز الشافعي بعد الهجوم على أغانيه مع شيرين

وقال عزيز الشافعي خلال مقطع فيديو نشره على حساباته على منصات التواصل: "الحملة اللي اتعملت ضدي الأسابيع اللي فاتت بدأت لما نزلت أغنية مع شيرين «الحضن شوك»، الناس في البداية هاجمت الأغنية قالوا درامية أوي، وليه شيرين بتعمل أغنية دراما أوي كده، لكن بعدين الأغنية نجحت وبقت رقم واحد وحققت أرقامًا كبيرة جدًا".

وتابع: "بعد كده عملنا أغنية «تباعا تباعا» وهي أغنية مش درامية، هي رومانسية، وبرضه اتعملت حملة هجومية شديدة جدًا عليها في أول 3 أيام، تريقة وسخرية من الأغنية واستخدام اللغة العربية في كلمات الأغنية والمفعول المطلق وحاجات كتير ضحكتني ومضايقتنيش منها".

وأضاف: "رغم حملة الهجوم الممنهج ده، الأغنية نجحت نجاحًا كبيرًا جدًا وحققت أكثر من 20 مليون مشاهدة على يوتيوب، ونجاحها سكت الناس اللي كانت بتهاجم الأغنية وبتهاجم عودة شيرين عبدالوهاب مع عزيز الشافعي، وبدأت أحس إن الحملة دي ضدي أنا شخصيًا".

أغنية «بحرية» لشيرين

أما عن الهجوم الذي تعرضت له أغنية «بحرية» لشيرين وحماقي، فقال: "أغنية بحرية اللي نزلت من يومين بان فيها أوي إن في قصد واضح للاغتيال المعنوي لعزيز الشافعي والقضاء على النجاح المستمر لسنوات طويلة، واللي توهج جدًا رمضان اللي فات بأغاني كتير زي «مش حبيبي بس» و«وننسى اللي كان» والإعلانات وغيرهم".

واستكمل: "من بداية الأغنية اللي نزلت أول إمبارح، نزل لينك بريمير على قناة حماقي قبل ما الأغنية تنزل بساعة ولسه محدش سمع حاجة، لقينا الناس دخلت تشتم في الأغنية، وده حصل برضه في «تباعا تباعا»، وبعد 4 ساعات لقينا صحفي منزل فيديو بيقول فيه: لماذا فشلت أغنية «تباعا تباعا»؟ يعني الناس ملحقتش تسمعها وهو قرر إنها فشلت، بس الناس قررت إنها تنجح نجاح كبير، لا يقل في نظري عن أغنية مهمة جدًا عملتها لشيرين اللي هي «بتمنى أنساك»".

واختتم: "دايمًا بسأل نفسي إيه اللي ورا الهجوم ده، وليه الناس ممكن تدخل تهاجم أغنية زي «بحرية» بالغل ده حتى من قبل نزولها. أنا شايف إن الأغنية طريقتها مختلفة، حكاية لطيفة بين بنت عايزة حبيبها ييجي يتقدملها، زي أي ديو دمه خفيف اتعمل زمان زي شادية وفريد الأطرش ومحمد فوزي وليلى مراد. هي حكاية لطيفة لا فيها إسفاف ولا فيها إساءة ولا حاجة ضد الدين علشان تبقى فيه طريقة الهجوم والكره والحقد ده على شخص اسمه عزيز الشافعي".

اقرأ أيضًا:

شيرين عبد الوهاب تستعيد بريقها الغنائي.. و"بحرية" تتصدر التريند

عزيز الشافعي يكشف موعد طرح "ديو" بين حماقي وشيرين