بعد جدل خذلان سهام جلال.. شريف إدريس يكشف موقفا إنسانيا لأمير كرارة

أمير كرارة وشريف إدريس

فاطمة سليمان

A . .A

دافع الفنان شريف إدريس عن صديقه الفنان أمير كرارة بعدما تم اتهامه بخذلان الفنانة الراحلة سهام جلال والتخلي عنها حين طلبت منه ترشيحها لأي عمل فني بعد فترة قضتها بدون عمل.

ماذا قال شريف إدريس عن أمير كرارة؟

ونشر شريف إدريس صورة له مع أمير كرارة عبر حسابه على منصة "فيسبوك" معلقًا عليها: "رحم الله الفنانة سهام جلال، بس عاوز أتكلم في حاجة ويشهد عليها ربنا في حق أمير كرارة، ودي شهادة أتحاسب عليها قدام ربنا".

وتابع: "أي عمل فني له مخرج ومنتج هما أصحاب القرار في مين يشتغل ومين ميشتغلش، فيه نجوم بتفرض رأيها وبتحب تشتغل مع ناس معينة وفيه نجوم ما بتدخلش غير بالخير وكل اللي بيعمله إنه ممكن يرشح حد ويقول وجهة نظره والقرار الأول والأخير بيكون في إيد المخرج والمنتج، ودي حاجة محدش يقدر يلومه أو يلوم غيره عليها".

وأضاف: “أنا شفت أمير بعيني بيرشح زملاء للمخرج حسين المنباوي في مسلسل "سوق الكانتو" منهم اللي ربنا وفقه واشتغل ومنهم اللي مكانش له نصيب، وعلي فكرة من بعد "سوق الكانتو" أنا عارف ووصلني أكتر من مرة أن أمير رشحني في أعمال ومحصلش نصيب إني أشتغل فيها لأن الرزق والشغل بتاع ربنا لا أمير ولا غيره".

واستكمل: "وأعتقد أن الزميلة العزيزة الراحلة سهام جلال، زعلت من موقف التليفون إنه مردش لأن حصل لخبطة في تسجيل الأرقام ودي حاجة غير مقصودة، والله يرحمها، أمير تواصل معاها واتصافو ومكانش فيه بينهم أي زعل وهي كتبت كلام جميل في حقه بس أنتم دورتوا على كلام التريند ونشرتوه".

واختتم: “يشهد الله أن أمير كرارة إنسان جدع ومتربي وابن أصول وعمره ما تأخر عني ولا عن غيري في أي حاجة، وفي حاجة أول مرة هاقولها لكم، وأتمنى أن أمير مايزعلش إني قولتلها، وأنا بصور "سوق الكانتو" والدي توفي (الله يرحمه ويحسن إليه)، أمير مسابنيش لحظة ورحمة أبويا حتى عزا والدي في مسجد الشرطة هو اللي اتكفل بيه، وجه ووقف معايا في العزاء لحد ما شطب، أنا كان لازم أتكلم وأقول حق ربنا، ربنا يرحم الزميلة العزيزة سهام جلال ويصبر أهلها ومحبيها ويخليك يا أمير يا ابن الناس الطيبين لبيتك وأولادك وشكرًا على كل حاجة حلوة عملتها معايا".