أم سفيان تروي تفاصيل صادمة بشأن علاقتها بطليقها قبل "واقعة المقابر" (فيديو)

صاحبة فيديو الدعاء على الزوج أمام القبر

ماريا روماني محمد حيزة

A . .A

كشفت "أم سفيان" صاحبة الفيديو المنتشر بحث أبنائها للدعاء على زوجها أمام أحد المقابر التابعة لعائلتها، التفاصيل الكاملة حول نشرها مقطع الفيديو والأسباب التي دفعتها لحث أبناها على الدعاء بتلك الطريقة.

القصة الكاملة لفيديو الدعاء على الزوج أمام القبر

وقالت أم سفيان خلال ظهورها في بث مباشر مع “تليجراف مصر” إن السبب وراء حث الأطفال للدعاء على والدهم، هو الضغط وكلامه السيء لها وأبنائها.

وأضافت سيدة الإسكندرية: “طليقي ظلمني أنا وأولادي ومش عاوز يدينا حقنا، هو مسافر بيشتغل برا، وفي يوم كان بيكلمني وبيسأل على الأولاد قولتله عند أختي اللي ساكنة في الطابق الأعلى من المنزل قالي خلاص خليهم عندها وبعدها عملي بلوك من كل مواقع السوشيال ميديا علشان مكلمهوش”.

وتابعت: “بعدها جه من السفر لم كل هدومه وراح عند والده، ومش عاوز يصرف على الولاد ولا يبعتلهم مصروف، فأبلغت شقيقتي بأخذ الأطفال والذهاب له ليبقوا عنده، ولكن عند ذهاب شقيقتي له مع الأولاد قام بالاعتداء عليها وقام بضربها في الشارع وذهب بعد ذلك لعمل محضر زاعمًا فيه أن أشقائي هم من اعتدوا عليه”.

وتابعت في حديثها لـ"تليجراف مصر": “بعد الصلح في المحاضر بيننا فوجئت بطلاقه لي غيابيًا، بعدما وصلتني ورقة الطلاق على منزلي”.

وأكملت: “في العيد هاتفته لطلب مصاريف للولاد لشراء لبس العيد، ولكنه شتمني وقفل التليفون، هو مكانش عايش معانا وإحنا متجوزين، كان بييجي من السفر شهر ويسافر 6 شهور لظروف عمله كـ لحام تحت الماء في أبو ظبي، لكن الولاد عارفينه وكانوا بيكلموه وهو مسافر”.

وأكملت: “وبعد كده كلمته تاني لإن الأولاد عاوزين يشوفه، وهما ملهومش دخل بالي بيننا، ولكنه رفض وقال لي قوليلهم أبوهم مات، ومكنتش عارفة أقولهم الكلام ده إزاي فاضطريت إني أعمل الفيديو اللي انتشر وأنا عارفة إني غلط”.

وأشارت إلى أن تصوير الفيديو كان وقت زيارتها لوالدها في مقابر العائلة، قائلة: “الفكرة جاتلي لما كنت رايحة أزور والدي في المقابر وافتكرت كلام طليقي روحت عملت الفيديو والولاد مكانوش فاهمين ولا عارفين حاجة، والولاد كويسين ونفسيتهم تمام”.

وواصلت: “أنا عارفة إن كل اللي بيتكلم عليا بيتكلم بالظاهر لأن الناس متعرفش حاجة، ميعرفوش إن الإنسان ده خاني وسجني وطلقني غيابي وكان بيضربني”.

واختتمت حديثها قائلة: “أنا معملتش معاه شيء وحش واتجوزنا في الشقة بتاعة والدتي وأنا اللي جهزت الشقة وكنت بشيل مونة البناء وبطلعها بنفسي، وحسبي الله ونعم الوكيل”.