"استدرجوه وقتلوه".. والدة طالب الهندسة تكشف تفاصيل جريمة إنهاء حياته غدرًا

كشفت والدة الطالب محمد هاني ضحية غدر زميله بكلية الهندسة في الأكاديمية العربية للعلوم والتكنولوجيا بالنزهة، أولى تفاصيل محاكمة المتهمين بإنهاء حياة نجلها

وقالت الأم في بث مباشر مع “تليجراف مصر” إن ابنها راح ضحية جريمة غدر بعد استدراجه خارج الأكاديمية، مشددة على ثقتها في عدالة القضاء وأنها لن تطلب سوى القصاص.

الأم تروي تفاصيل الواقعة

وأضافت والدة محمد هاني: "ابني غُدر به يوم 26 مارس… كل الناس عارفة التاريخ ده، أو الناس اللي متابعة الواقعة عارفاه. هم استدرجوه بره الجامعة، وهو كان عنده محاضرة،  جاتله رسالة وقالوا له إحنا عايزينك، فنزل وما كانش عارف أصلًا إيه الموضوع".

وأضافت: "نزل عادي وفي دماغه إنهم هيتكلموا معه عادي. وكان المفروض إن أحمد حطب بس اللي كان عايزه، قاله عدِ الناحية التانية عايز أتكلم معك،  ابني راح عادي، قال ماشي عايز يتكلم معه هيتكلم معه،  ما جاش في دماغه خالص إنه هيبقى فيه غدر، مش قتل. لو كان عارف إن الولد ده معه سكينة، ما كانش عدى الشارع وما كانش راح".

"مش أول مرة".. محاولة سابقة قبل 6 شهور

وأكدت والدة الضحية أن الواقعة لم تكن الأولى، موضحة: "قبلها بست شهور حصل نفس الموقف. يعني أنا ابني كان هيموت في شهر 9 اللي فات. قاله عدِ الشارع عايز ألعب معك يا هاني،  ابني رفض وقاله الرجولة مش بالسلاح، الرجولة بالإيد. يعني أنت قادر عليّ بدراعك، العب معي، أنا ما بمسكش سلاح".

وتابعت: "قبلها بست شهور هو برضه كان متربص له، وابني ما راحلهوش والموضوع خلص. إيه يا ابني اللي نزلك تاني في اليوم ده؟ رايح له ليه على غدر؟ ودايمًا في رمضان معظم الولاد ما بيروحوش، مش منتظمين. أنا ابني الأول على دفعته، فما بيفوتش محاضرة. قدر ربنا عشان عارف إنه مش هيعرف يعوضها".

"عارفين إنه يتيم واستغلوا اللحظة"..

ووجهت والدة محمد هاني رسالة مؤثرة: "تعبت عليه، وشقيت عليه عشان ييجوا ناس ما يعرفوش ربنا، عارفين إنه يتيم واستغلوا اللحظة دي. استغلوها إزاي؟ إنه مالهوش عائلة وما عندوش أب. يتيم يعني، وما حدش هيبكي عليه ومالهوش دية. هو ده المفهوم بتاع الناس دي".

وأضافت: "لا إنتو نسيتوا إن فيه ربنا. يبقى هنا تحديت ربنا هو يتيم بمزاجه؟ أبوه متوفي بقاله ست شهور، فإنتو استغليتوا إنه يتيم ربنا سبحانه وتعالى كان في ظهره. ماشي هو وحيدي، وأنا أمه وأبوه. أنا قلبي عليهم دلوقتي كلهم بصراحة، لأن فيه مليون أحمد حطب تاني على فكرة فلازم كلنا نخاف على ولادنا، ولازم الناس دي تاخد جزاءها".

تقرير الطب الشرعي: طعنات في الصدر والقلب

وكشفت الأم عن تفاصيل من تقرير الطب الشرعي: "هو أنهى حياته وجاء بواحد تاني معه، متربصين مع بعض ومنسقين مع بعض. أنت هتمسكه من وراء وأنا هخش عليه من قدام. ابني متعور، أنا قرأت تقرير الطب الشرعي. هنا وهنا، حبيبي بيدافع بإيده زي ما هو واخد على ذراعه كله بيدافع. أخذ طعنات هنا وهنا، واثنين في صدره وواحدة في قلبه".

وتابعت بحزن: "ما كانوش عايزين يوروني شكله طبعًا. كنت عايزة أغسل ابني وأشوفه للمرة الأخيرة، قالوا لي مش هنقدر نوريكِ ابنك بكل الجروح دي. جروح كثيرة. وأنا أصلًا ابني لما كان بيتعور تعويرة صغيرة كنت بتجنن عليه".

تأجيل الجلسة لغياب المتهم الثاني

أوضحت والدة الضحية: "اتأجلت ليوم 9 يونيو عشان ياسين ما كانش موجود، اللي هو المجرم التاني اللي مسك ابني من وراء وكتّف ابني عشان أحمد حطب يقتله.

واختتمت الأم حديثها بمطلبها: “طبعًا القصاص. اللي قتل لازم يتعدم، مش عايزة أكتر من كده. عايزة حق ابنكم يا جماعة، هو مش ابني لوحدي والله، هو ابنكم كلكم، ومصر كلها رافضاهم. متأكدة بإذن واحد أحد إن حق ابني هييجي إن شاء الله”

اقرأ أيضا:

بعد واقعة مدرسة "هابي لاند".. طلب إحاطة في البرلمان بشأن الاعتداء على الأطفال

استدعاء مديرة مدرسة هابي لاند وشهود لسماع أقوالهم في واقعة التعدي على تلميذة

تأجيل أولى جلسات محاكمة المتهمين بإنهاء حياة طالب هندسة بالأكاديمية العربية للعلوم