نادر نور: رجعت من الصفر في 2021 وصدمتني أفعال بعض الفنانين

كشف الفنان نادر نور عن كواليس رحلة عودته إلى الساحة الغنائية بعد فترة غياب، معرباً عن عتابه على بعض زملائه في الوسط الفني الذين يتجاهلون التواصل معه، بينما أشاد بموقف الفنان محمود العسيلي وطريقته الراقية في التعامل.

البداية من الصفر بعد غياب طويل 

أوضح نادر نور، خلال حلوله ضيفًا في برنامج "كلام الناس" مع الإعلامية ياسمين عز، أن ابتعاده عن الساحة في الفترة الماضية كان يعود لظروف شخصية بحتة أثرت عليه بشكل كبير، مشيراً إلى أنه بدأ محاولات العودة الفعلية منذ عام 2021.

وقال: "لما قررت أرجع، حسيت إني ببدأ مشواري من الصفر تاني خالص، والموضوع كان محتاج مني مجهود مضاعف. وفي فترة غيابي دي، كنت قافل على نفسي الأبواب عشان أذاكر وأحضر شغل جديد وأثقف نفسي موسيقياً، لأن الثقافة هي اللي بتدي للفنان خيال وإبداع في شغله".

تجاهل الفنانين 

وعن الصدمات التي واجهته بعد العودة، أشار نادر نور إلى أنه بدأ منذ عام 2022 في طرق أبواب النجوم مجدداً لعرض أعماله، لكنه فوجئ بردود أفعال متباينة، قائلاً: "ناس كتير من اللي تواصلت معاهم كنت اشتغلت معاهم قبل كده وعملنا نجاحات، ومع ذلك ملاقيتش منهم أي رد فعل والغريب بقى، إننا ساعات نتقابل صدفة في أي مكان، فيقعدوا يعاتبوني ويقولوا لي: (يا عم أنت فين ومختفي ليه كلمنا)، ولما أجي أكلمهم فعلاً وأتواصل معاهم، مابلاقيش أي استجابة ومبيردوش خالص".

وشدد نور على أنه لا يملك أي عقدة من العمل مع الوجوه الجديدة: "أنا معنديش عقدة إني لازم أشتغل مع نجم صف أول بس، بالعكس، بشتغل مع شباب لسه بيبدأوا طريقهم.. بس في ناس بتظهر مرة وتختفي، وناس تانية مابتردش عليا خالص".

محمود العسيلي نموذج للرقي والتقدير

وفي ختام حديثه، أكد نادر نور أنه لا يحمل أي خصومة أو زعل تجاه أحد، وأن المسألة بالنسبة له تتعلق بالتقدير الأدبي فقط، قائلاً :"مش معنى إني بعتّ لمطرب أغنية يبقى هو مجبر يعملها، ده حق متبادل.. بس أنا ليا حق الرد، لإن أنا راجل ليا اسمي وتاريخي وأرض صلبة واقف عليها من النجاحات. الرفض مبيزعلنيش، بالعكس ده بيسعدني، لإنك بكده بتكون قدرت وقتي ومجهودي".

وضرب نور مثلاً  بالفنان محمود العسيلي، مشيداً بموقفه: "على سبيل المثال، العسيلي مثلاً لما بعتّ له شغل، رد عليا بكل وضوح وقالي: (نادر اعذرني، مش حاسس الأغنية دي شبهي) أنا احترمته جداً وشكرته، لإن بكده قدر اسمي وتواصلي معاه، والفنان الحقيقي مبيتحرجش إنه يرفض الشغل بذوق".

أقرأ أيضًا:

نادر نور يحرج رامي صبري بـ"سكرين واتساب": ولا يهمك وأنا مصدقك!