فتاة تستغيث من شقيقها بالدقهلية: اتحرش بيا وسرق جهازي تحت تأثير المخدرات

تفحص أجهزة الأمن بوزارة الداخلية، منشور ومقطع فيديو متداول لفتاة تدعى "ن.إ" تستغيث فيه من تحرش شقيقها بها وتعديه بالضرب عليها على والدتها بمحافظة الدقهلية. 

فتاة تستغيث من شقيقها بالدقهلية

وقالت الفتاة بمنشور لها عبر “فيسبوك”: "دي أول مرة في حياتي أكتب حاجة هنا عن حياتي الشخصية ويمكن معرفش أصيغ الكلام أو أرتبه كويس، أنا تم التحرش بيا بشكل بشع وصريح من أخويا في سنة 2017 كنت وقتها في ثانوية عامة.

وأضافت: "من الصدمة فضلت شهر لا بتكلم ولا بخرج من البيت لمدرسة أو دروس وانفصلت من المدرسة وقتها بسبب الغياب والنتيجة سقطت في مادتين وأنا مقدرتش أتكلم وقتها ولا كنت عارفة أعمل إيه أو أقول إيه، ولأنه كان عارف اللي عمله كان كل شوية يجي يسألني مالك حد زعلك أو أنا زعلتك، وده عشان يبعد الشبهة عنه قدام بابا وماما".

شاب يتعدي على شقيقته ووالدته بالدقهلية

وأكملت: “للأسف أنا كملت فى السكوت وقتها فترة كبيرة وعشان سكت، اتجرأ عليا أكتر وضربني في مرة بعد واقعة التحرش بـ6 شهور ووقتها قولت لماما اللي حصل، ولما واجهته قدامها اتهمني بحاجات بشعة، وأنا غلطت إني فضلت ساكتة السنين دي كلها، في إني أقدم بلاغ رسمي بواقعة التحرش”.

وتابع: “أخويا حاليًا مدمن آيس وبودرة ومن بعد وفاة بابا وهو قاعد في البيت، وماما اللي بتصرف عليه، وقبل العيد بأسبوع كان في أوضتين في البيت مقفولين بمفتاح فيهم جهازي في واحدة منهم عرف يسرق مفتاحها من ورانا والتانية كسر كالون الأوضة وسرق كل اللي فيهم في وقت كنت أنا وماما برا البيت”.

تفاصيل الواقعة

وأكملت: "سارق حاجات بقيمة 250 ألف جنية وكان عامل كل ده وكان قاعد واكل شارب معانا وماما هي اللي اكتشفت السرقة واول ما اكتشفتها جري وهرب، وماما عملت بلاغ بالسرقة، وفي حد جه عمل معاينة، ولكن مفيش أي فايدة ولا أي حد اتحرك وكل يوم كان بيبعتلنا حد من قرايبنا، واتفقنا اننا هنعالجه وبالفعل ماما راحت معاه لحد المصحة وأول ما وصلوا سابها وهرب واختفى من المكان، وبالمناسبة دي، مش أول مرة نعالجه، دخل قبل كده مصحة خاصة في آخر 2023، وصرفنا فوق الـ100 ألف على علاجه وطلع ورجع تاني للآيس وكل أنواع المخدرات".

وقالت: “لما قولنا للناس اللي اتدخلت إنه مش هيدخل البيت تاني حصل زي ما في الفيديو المنشور، كل يوم بيجي تحت البيت يتهجم علينا بأبشع الكلام وبيبقي هيكسر البوابة علينا، وأنا ماما في البيت لوحدنا واتصلنا بالنجدة عشان إحنا قاعدين لا عارفين نخرج ومحبوسين في البيت ومهددين طول الوقت وعايشين في رعب”.

اقرأ أيضًا:

استدعوها للتحقيق.. الأمن يفحص منشور طبيبة دمنهور حول انتهاكات مستشفى الشاطبي

"الكل بيوجّب".. الأمن يفحص فيديو "علقة ساخنة" لشاب متهم بالتحرش داخل ميكروباص