"دفع تمن شهامته".. شقيق ضحية أبوالنمرس: "قطعوه قدام طفل 3 سنين" (فيديو)

شهدت منطقة أبو النمرس جريمة مرعبة عندما أقدم 3 أشقاء على خطف شاب وتقطيعه لـ15 قطعة أثناء محاولته الدفاع عن سيدة حاولوا التعدي عليها.

وقال محمد فارس، شقيق الضحية لـ"تليجراف مصر": "رامي عنده حوالي 34 سنة، يعني شاب في بداية حياته لسه يعني مفيش أي مشاكل مع حد، محترم جداً، خدوم جداً، يعني بيحب يخدم أي حد".

وأضاف: "حتى لما شاف حالة إنسانية مرضيش يتخلى عنها لا وقف معاها وساعدها.. كنا لسه عاوزين نخطب له ولسه بنمشي في موضوع إن إحنا نجوزه بس للأسف ملحقناش نفرح بيه".

البداية: استغاثة أم لإنقاذ ابنها المريض

يروي محمد تفاصيل اليوم الأخير: "الست اللي هو جاب لها شقة وآواها هي وابنها اتصلت بيه تستغيث بيه إن ابنها تعبان جداً ولازم يروح للمستشفى، فطبعاً هو من غير تفكير راح خدها فعلاً وراح بيها المستشفى وكشف على الولد ورجع جاب له العلاج وطلعهم فوق".

مكالمة كمين لتسليمه للجناة

ويقول شقيق الضحية: "يا دوب هو لسه قاعد مفيش عشر دقايق جاله تليفون من حد صاحبة البنت دي إن هي مش لاقية مكان تقعد فيه، هو بقلبه الطيب قالها ماشي تعالي ووصف لها المكان.. أتاريها كانت بتسلمه لناس هم عايزين ياخدوا ابنها".  

ويؤكد: "القصة إن والدته كانت قاعدة في الشارع بيه هم خدوه من والدته وخدوا والدته شغلوها عندهم في البيت تخدم بلقمتها، فلما اتعذبت هربت منهم".

لحظة الهجوم

ويصف محمد المشهد: "دخل عليهم حوالي 12 أو 13 واحد معاهم طبنجات وأسلحة بيضاء، قعدوا يضربوا فيهم.. طبعاً هي اتضربت معاهم، ورامي حاول يدافع عنها ما عرفش فطبعاً راحوا ضاربينه.. وقع قاموا واخدينه ونازلين بيه وخدوه في ميكروباص كان مستنيهم تحت ومشي بيهم على نزلة السمان في البيت عندهم".

قطعوه 15قطعة 

وعن مصير شقيقه يقول محمد باكيًا: "اللي عرفته إن كل اللي حصل ده تم تقطيعه يعني أجزاء قدام طفل صغير تلات سنين ونص. الطفل نفسه هو اللي حكى لوكيل النيابة كل اللي حصل ده".  

ويكشف محمد: "إحنا ما عرفناش.. لقينا المباحث جت لنا البيت هنا خدوا والدي.. قعدنا في القسم يوم ونص ما نعرفش أي حاجة من الساعة 3 الظهر لحد تاني يوم الصبح".  

ويضيف: “في الآخر خالص ظابط المباحث جالي قالي البقاء لله وأخوك اتوفى.. إحنا كل ده مفكرين إن رامي عامل مشكلة وبيدور عليه”، لافتًا إلى أن الواقعة حدثت يوم الأحد 7/ 6، وعلمت الأسرة يوم الإثنين 8/ 6.

وكيل النيابة: “أخوك دفع تمن شهامته”

يختتم محمد حديثه: "شفت صورة أخويا في النيابة.. ربنا ما يوري لحد.. دول مش بني آدمين، لو حيوان هيبقى عنده رأفة بالبني آدم بالمنظر ده لكن دول لا بهايم ولا حيوانات ولا بني آدمين دول كفرة".

ويضيف: "وكيل النيابة قالي إن شاء الله حقه جاي لأن أخوك مظلوم.. أخوك كان بيدافع عن طفل صغير.. أخويا دفع تمن شهامته".

العثور على جوالين بداخلها أشلاء

وكانت أجهزة أمن الجيزة قد نجحت في فك لغز الجريمة، بعدما تلقى العميد محمد الصغير، رئيس قطاع الجنوب، إخطاراً من العقيد محمد داود، مفتش مباحث أبو النمرس، بالعثور على جوالين بداخلهما أجزاء آدمية.

وانتقل المقدم وليد كمال، رئيس المباحث، لموقع البلاغ وتبين أن الأشلاء لشاب في العقد الثالث من العمر.

كشفت التحريات التي تمت بإشراف اللواء محمد مجدي أبو شميلة، مساعد وزير الداخلية لأمن الجيزة، ومتابعة اللواء هاني شعراوي، نائب مدير الإدارة العامة للمباحث، أن المتهمين أشقاء استعانوا بأصدقائهم وتوجهوا لمنزل سيدة بهدف الاستيلاء على طفل تتولى رعايته وتربيته، وتدخل صديق السيدة ومنعهم من اصطحاب الطفل، فنشبت مشادة تطورت إلى اعتداء عليه وقتله.

أضافت التحريات أن المتهمين تخلصوا من الجثمان بعد الجريمة بتقطيعه إلى عشرات الأجزاء ووضعها داخل جوالين، في محاولة لإخفاء معالم الجريمة وتعطيل التوصل إلى هوية المجني عليه.

سقوط المتهمين واعترافات تفصيلية

عقب تقنين الإجراءات، تمكنت قوة أمنية بقيادة المقدم وليد كمال من ضبط المتهمين، وبمواجهتهم أقروا بارتكاب الواقعة، وأرشدوا عن تفاصيل تنفيذ الجريمة ودوافعها.

تم تحرير المحضر اللازم بالواقعة، وأحيل المتهمون إلى النيابة العامة التي باشرت التحقيقات لكشف كافة ملابسات الجريمة المروعة.

اقرأ أيضًا:

استدراج وطعنات غادرة.. تفاصيل مقتل طالب "الابن الوحيد" في الدقهلية (فيديو)