مأساة عروس فقدت جهازها بـ600 ألف جنيه في حريق منشأة ناصر

عروس منشأة ناصر

سيف السيد

A . .A

لم تقتصر خسائر الحريق الهائل الذي اندلع داخل مخزن أخشاب بالطابق الأرضي في منطقة منشأة ناصر على انهيار العقار بالكامل وسقوط ضحايا ومصابين، بل امتدت لتسرق أحلام عشرات الأسر، وبينهم عائشة سيد إبراهيم، عروس كانت تستعد للزفاف بعد أشهر قليلة، قبل أن تتحول تجهيزات عمرها إلى رماد.

وأسفر الحريق عن انهيار العقار بالكامل، واستشهاد نقيب شرطة وأمين شرطة وأحد الأهالي، إلى جانب إصابة 19 آخرين، فيما لا تزال آثار الكارثة تخيم على سكان العقار الذين فقدوا منازلهم وممتلكاتهم.

ملحقناش ناخد أي حاجة

وروت عائشة سيد إبراهيم، تفاصيل اللحظات الأولى لاندلاع الحريق، قائلة: "إحنا كنا قاعدين الساعة تلاتة ونص بالليل، ولقينا مرة واحدة شباك الصالة عندنا النار داخلة منه، من المصنع اللي تحتينا.. يا دوب بصحّي إخواتي الشقة كلها ولعت، الجيران دخلوا يحاولوا يطفوا أي حاجة في الشقة، والعمارة كلها نزلت، ملحقناش ناخد أي حاجة من الشقة، يا دوب بس الطرحة اللي خدتها من الشقة".

جهاز عمره تحول إلى رماد

وأضافت لـ“تليجراف مصر”، أن جميع تجهيزات منزل الزوجية احترقت بالكامل، موضحة: "عفشي كله في الشقة، غير عفش بيتنا أصلًا، جهازي كله، أنا والدي متوفي، كان مجهزني، وأمي مكملة جهاز، وأمي مريضة ومحجوزة في المستشفى أصلًا بقالها شهر، وأخويا قعد من المدرسة عشان يكمل جهازي هو كمان، أنا مخطوبة وكنت هتجوز.. عفش كامل كله، تلاجة وغسالة وبوتاجاز وكل الأجهزة الكهربائية وكل الهدوم والملايات كل حاجة جاهزة، غير إن أصلًا كان في فلوس في الشقة، يعني أنا في حاجات في الشقة قيمتها 600 ألف جنيه وفي فاتورة بيهم أصلًا بس كله ولع".

كنت هتجوز بعد 6 شهور

وتابعت عائشة، وهي تستعيد حجم خسارتها: "600 ألف جنيه، عفش عروسة بالفلوس اللي كانت، أنا كنت شايلة فلوس معينة في البيت لزوم الفرح، كنت هتجوز كمان 6 شهور، حاجتي كلها ولعت، هدومي، بالملايات، بهدوم البيت كله ولع.. جهازي كله بالحلل بكل حاجة ولع تلاجة وغسالة وبوتاجاز ومايكرويف كل حاجة ولعت، الشقة كلها بقت على الأرض.. هدوم البيت نفسها وأجهزة البيت وكل حاجة، الغطاء حتى ماخدناهوش من البيت، التليفون ماخدناهوش من البيت، كل حاجة في البيت راحت مع النار".

وأضافت أن شقتها كانت أولى الوحدات التي طالتها النيران بسبب وقوعها أعلى المخزن مباشرة، قائلة: "إحنا أول ناس متضررين بعد المصنع على طول، إحنا فوق المصنع على طول فإحنا أول ناس اتضرينا، العمارة كلها نزلت، كأن الأرض اتشققت وبلعت الشقة تحتيها."

مناشدة للحكومة: ماحدش هيجهزني تاني

ووجهت عائشة نداءً إلى الحكومة لتعويضها عن خسائرها، مؤكدة أن ظروف أسرتها لا تسمح بإعادة تجهيزها من جديد.

وقالت: "ماحدش هيجيبلي جهازي تاني، فأنا طالبة إن الحكومة تعوضني بجهازي ده، أخويا شاب عنده 17 سنة مش هيعرف يجهزني، وأختي أصلًا مريضة كبد، عندها 10 سنين مريضة كبد وقلب وعندها الطحال وبتربط دوالي مريء في بطنها، وأمي مرمية في المستشفى عندها 43 سنة قعدت 3 شهور ونص وخرجت ودلوقتي بقى لها شهر في المستشفى عندها ورم في القولون، فأنا طالبة من الحكومة إن هي تعوضني عن حاجتي دي كلها، تعوضني عن جهازي ده".

شقة بديلة.. لكن من يعوض جهاز العروس؟

وأوضحت أن المحافظة وفرت للأسرة وحدة سكنية بديلة، إلا أن ذلك لم يحل أزمة فقدان جهازها بالكامل، قائلة: "المحافظ إدانا شقة في مايو، أوضتين وصالة، يعني أنا شقتي كانت تلاتة وصالة وفيها عفش، لأ اتنقلنا مايو أوضتين وصالة، العفش بتاعي أنا ده فين؟ ده الله أعلم ماحدش اتكلم معايا فيه إنه هيجيبلي غيره".

وأضافت: “حاجتي كانت بقيمة 600 ألف جنيه وربنا وحده اللي شاهد على كلامي إن أنا مابكذبش في حرف، ده مافيش منه أي حاجة موجودة”.

موجهة بصرف المساعدات لأسر الضحايا.. "التضامن" تتابع حريق عقار منشأة ناصر