"قالت لنا أنتم جايين من ورا الجاموسة".. نص أقوال خديجة المجني عليها في مشاجرة طبيبة الأسنان بشبرا (انفراد)

شهد مركز صحة الكابلات بمنطقة شبرا الخيمة واقعة أثارت حالة من الجدل، بعدما تحولت زيارة مريضة لعيادة الأسنان لتلقي العلاج إلى مشادة كلامية انتهت بمشاجرة داخل المركز، قبل أن تمتد إلى محيط مكتب مديرة المركز، وسط تبادل للاتهامات بين الطرفين، وتحرير محاضر بالواقعة، لتباشر جهات التحقيق تحقيقاتها لكشف ملابسات ما جرى.

أقوال خديجة المجني عليها في واقعة طبيبة أسنان شبرا الخيمة 

وفي تطور جديد بالقضية، حصلت "تليجراف مصر" على نص التحقيقات في الواقعة، والتي تضمنت أقوال المجني عليها خديجة، حيث جاءت أقوالها أمام جهات التحقيق على النحو التالي:

"اللي حصل إن أنا وأختي فاطمة رحنا مركز صحة الكابلات، عشان كنت محتاجة دكتور أسنان في أسرع وقت، لأن الدكتور بتاعي كان إجازة. ولما دخلنا استقبال عيادة الأسنان وقفت أشرب عصير، لأني مكنتش فطرت وخفت آخد البنج من غير ما أفطر، وساعتها الدكتورة والممرضة اللي كانت معاها استكتروا إن الدكتورة واقفة مستنياني أشرب العصير، وفضلوا يستعجلوني وابتدوا يتعاملوا معايا أنا وأختي باستحقار من غير مبرر.

وأضافت: "لما دخلنا العيادة الدكتورة عاملتني وحش، وكانت بتتعامل معايا بدونية من غير سبب، وبعدها خلعتلي ضرس، ورمته على الترابيزة اللي جنبها، فقومت وطلبت أشوف الضرس عشان أتأكد إن الجذر اتخلع، زي ما الدكتور بتاعي كان قايلي".

وتابعت: "هي رفضت وقالتلي: كلامك مش معايا اطلعي بره، وبعدها رمت الضرس، فأختي خرجت تستأذن الدكتور اللي كان في الاستقبال عشان نشوف الضرس، لكنها قالتلنا: روحوا خدوه من الزبالة، أنا مش شغالة عندكم، فإحنا سبناها وخرجنا من العيادة" .

مشادة كلامية تطورت لاشتباك بالأيدي

وأكملت: "وإحنا خارجين شتمتنا وقالت: أشكال وسخة، فسألتها مين الأشكال الوسخة؟ فقالت: إنتوا حثالة وجايين من ورا الجاموسة. وساعتها حصلت بينا مشادة كلامية، والدكتورة مسكت مية ورمتها علينا، وإحنا قولنا لها إننا هنشتكيها، لكنها فضلت تهددنا إنها هتحبسنا".

وأضافت: "طلعت تليفوني وصورت اللي بيحصل، فالدكتورة اتعصبت وضربتني أنا وأختي، وبعدها روحنا نقطة الشرطة اللي قدام المركز، لكن مرضيوش يعملوا محضر، ومحدش رضي ييجي معانا للمركز، وقالولنا روحوا القسم".

واستطردت: "كلمت والدي وحكيتله اللي حصل، فجالي هو وإخواتي محمد ومعتصم، وقالوا ندخل نشتكي لمديرة المركز. ولما دخلنا أنا ووالدي وإخواتي وأختي فاطمة، وإحنا على باب مكتب المديرة، لقيت اتنين مكنوش موجودين قبل كده، وعرفت بعدين إنهم والد الدكتورة وأخوها."

واختتمت أقوالها قائلة: "محمد أخويا قال لمديرة المركز: إحنا جايين نحل الموضوع باحترام، لكن أخو الدكتورة أول ما شافنا قال لمحمد: إنت إيه اللي جابك هنا يا ابن (لفظ خارج)، وجايب (لفظ خارج) اللي معاك دول ليه؟ وبعدها الدكتورة جت وضربتني وأنا واقفة، وطردونا بره المكتب، وساعتها أخو الدكتورة رمى عليا زجاج وعورني، فوقعت على الأرض، وسمعت صوت صريخ وخناق، وبعدها أُغمي عليّ، وده كل اللي حصل."

اقرأ أيضًا:

أمر إحالة طبيبة أسنان شبرا الخيمة يكشف تفاصيل الاتهامات المتبادلة