بعد ضبط المتهم.. شقيق ضحية الدهس بالشروق: "أمي ماتت وهي مستنية الخبر" (خاص)

الضحية وأمها وشقيقها

A . .A

لم يكن خبر القبض على المتهم في حادث دهس فتاة الشروق سمر محمد حسنين، كافيًا ليرسم الفرحة على وجوه أسرتها، فقبل وصول الخبر بساعات قليلة، كانت الأسرة قد ودعت الأم، التي لم تتحمل صدمة فقدان ابنتها، ورحلت وهي تنتظر أن تسمع خبر القبض على المتهم.

أمي ماتت وهي مستنية الخبر

وقال أمير، شقيق الضحية، في تصريحات خاصة لـ" تليجراف مصر"، إن والدته كانت تعيش كل لحظة على أمل أن يطمئن قلبها بأن حق ابنتها لن يضيع، موضحًا: “من يوم وفاة سمر، أمي كانت كل يوم تسأل: وصلوا له؟ اتقبض عليه؟ كانت بتنام على أمل وتصحي على نفس الأمل، وتدعي ربنا قبل أي حاجة إنه يجيب حق بنتها، للأسف الخبر جه بعد ما راحت، وكان نفسها تعيش اليوم ده.”

الساعات الأخيرة لوالدته

وأضاف أمير أن والدته دخلت في حالة نفسية وصحية سيئة منذ رحيل شقيقته، قائلًا: “بعد وفاة سمر، أمي بقت إنسانة تانية، مكانتش قادرة تاكل ولا تشرب، وكل شوية تنادي وتقول: يا سمر... يا سمر، يوم وفاتها، حوالي الساعة العاشرة مساءً، بدأت تظهر عليها علامات التعب الشديد، وحسينا إن حالتها بتسوء قدام عنينا، وكانت لسه بتنادي على سمر، حاولنا نطمنها، لكن حالتها كانت بتتدهور بسرعة.”

وتابع: “حوالي الساعة 12 بعد منتصف الليل، تعبت جدًا، خدناها على المستشفى، لكن للأسف توفيت هناك، إحنا في أقل من أسبوع فقدنا أختنا، وبعدها فقدنا أمنا، والبيت كله تحول لعزاء.”

القبض على المتهم

وأوضح أن لحظة إبلاغه بالقبض على المتهم لم تكن لحظة فرحة، بقدر ما كانت لحظة استحضار لوالدته، قائلًا: “أول حد جه في بالي أمي، وقلت يا ريتك يا أمي كنتِ عايشة وشوفتي اليوم اللي كنتِ مستنياه، إحنا حسينا إن ربنا جبر خاطرنا، لكن كان نفسنا الجبر ده ييجي وهي وسطنا.”

وأكد شقيق الضحية أن الأسرة لا تبحث سوى عن تطبيق القانون، وأن القضية بالنسبة لهم لم تنتهِ بمجرد القبض على المتهم، وإنما بدأت مرحلة جديدة ينتظرون فيها أن تأخذ العدالة مجراها.

واثقين إن حق سمر مش هيضيع

وقال: “إحنا مؤمنين بقضاء ربنا، وعارفين إن الأعمار بيد الله، لكن اللي وجعنا أكتر إن أختي اتسابت بعد الحادث واتسابت تنزف.. لو كان وقف وحاول ينقذها أو نقلها للمستشفى بدل ما يهرب، كان على الأقل عمل اللي يمليه عليه ضميره، وساعتها كان الموقف هيكون مختلف.”

وأشار أمير إلى أن الأسرة كانت تتابع لحظة بلحظة جهود أجهزة الأمن حتى إعلان القبض على المتهم، معربًا عن تقديره لجهود رجال البحث الجنائي في تتبعه وضبطه.

وأضاف:"كنا واثقين إن حق سمر مش هيضيع، والحمد لله المتهم اتقبض عليه، وبنشكر كل رجال الداخلية اللي اشتغلوا لحد ما وصلوا له."

واختتم شقيق الضحية تصريحاته قائلًا: “إحنا فقدنا أختنا، وبعدها فقدنا أمنا تاني يوم، الوجع كبير، ومفيش حاجة هترجعهم، لكن كل اللي بنتمناه إن العدالة تاخد مجراها، وإن حق سمر يرجع بالقانون، وربنا يرحمها ويرحم أمي.”