أبو الليف: أيمن بهجت قمر وصفني بمطرب أغان هابطة وربنا نصفني

هاجم الفنان نادر أبو الليف نجل شقيقته الشاعر أيمن بهجت قمر، خلال لقائه مع الإعلامية إنجي هشام، في برنامج "المنسي" المذاع عبر شاشة قناة "هي".

وقال أبو الليف: “كنت عامل ألبوم اسمه سلف ودين، وده كان أول ألبوم للشاعر أيمن بهجت قمر، واللي بيقول أني معملتش نجاح بعد ما سيبت أيمن بهجت قمر، أنا أسف ليه ولكن مش أيمن بهجت قمر اللي نجحني، ربنا اللي نصفني لأنه عالم بحالي وتعبت وشقيت علشان أوصل لده”.

أنا اللي دخلت أيمن بهجت قمر ستوديو

وتابع: أنا أول واحد دخلت أيمن بهجت قمر ستوديو، وأنا أول واحد شجعه يكتب أغاني، الكلام ده سنة 1995، هو قريبي وخدته معايا الاستوديو وفي شهود على الكلام ده، وفي إثباتات علشان أنا خاله وكان صعبان عليا أن والده الشاعر والسيناريست الكبير بهجت قمر توفي، وهو ابن أختي وبدأ يقولي والنبي يا خالو خدني معاك ستوديو وأنا عايز أكتب أغاني وغنيلي أغنية.

وأضاف: أنا مش من النوع اللي ممكن أخسر دمي علشان جنيه أو شغل، إحنا في دم بينا وقرابة حتى لو هو أنكر ده، أنا مديت له إيدي على أساس أنه ابن أختي، وهو كان بيقول أن أنا مطرب أغاني هابطة، ولو قولت في حقه كلمة وحشة هبقى أنا كمان كده.

واختتم أوب الليف قائلا: أنا لاقيته طالع في برنامج بيقول أنا اشتغلت في بداياتي مع ناس أشباح ومطرب أغاني هابطة، طيب مطرب الأغاني الهابطة ده أنت كنت بتروح معاه الاستوديو تتحايل عليه ليه؟ كنت بتقوله والنبي يا خالو عايز اكتبلك أغنية ليه؟ كل واحد بيبان في الظروف، وربنا يهديه ويديه على قد ضميره ونيته.