"حرقت وجهي وطلبت لي النجدة".. سيدة تتهم طبيبة تجميل بتشويهها (خاص)

اتهمت فتاة تُدعى دنيا عاشور إحدى طبيبات التجميل بتشويه وجهها بعد إجراء تجميلي وهو "تقشير كيميائي" دون أن تطلبه منها.

بداية المشكلة

وقالت عاشور لـ"تليجراف مصر"، منذ شهر ذهبت لطبيبة تجميل تُدعى د.ص، لوجود دهون تحت الجلد في وجهي وبثور ومشكلات جلدية بسيطة وذهبت للطبيبة لعدم استخدام أي شئ خطأ لوجهي.

تقشير كيميائي

وأضافت، "قالتلي هكتبلك على عدة كريمات طبية لوضعها ولكن قولت لها إن وجهي حساس ولا يقبل تلك الكريمات فردت علي بأنهاء ستجري لي "تقشير كيميائي" وهو إجراء تجميلي وطبي يتم فيه وضع محلول أحماض على الجلد لإزالة الطبقات التالفة وتحفيز نمو خلايا جديدة".

وتابعت، "قولت لها اللي حضرتك شايفاه أعمليه، وعند البدء في إجراء جلسة التقشير الكيميائي لم تقم بتطهير وجهي أو غسلة بل بدأت في الجلسة فورًا وبعد الانتهاء قالت لي "الجلسة خلصت وكويسة".

وأردفت، بعد ما انتهيت وذهبت إلى المنزل وجدت وجهي به تصبغات غامقة تزداد، بعد كل نصف ساعة بدرجة أكبر، وعند تصويري لوجهي وإرسالة إلى العيادة قالت لي مساعدة الطبيبة أن هذه النتيجة غير طبيعية ويجب أن أذهب للعيادة فورًا".

الدكتورة قالتلي وشك اتحرق 

وتابعت دنيا، الدكتورة بعد ما شافت الصورة كلمتني في الموبايل وقالتلي انتي وشك حساس وفعلا اتحرق، وأرسلت لي أسماء كريمات للحروق.

واستكملت، "لما روحتلها العيادة قالتلي "انتي عاملالي استريس" وادتلي علاجات تاني وقالتلي تعالي بعد 3 أسابيع ولما روحت تاني العيادة المساعدين رفضوا يدخلوني وطلبولي النجدة".

وتابعت، "لما النجدة جات الدكتورة قالت أنا معرفهاش، فأنا قولتلهم لا أنا كنت عندها وهي اللي حرقتلي وشي ووريتهم الروشتة بتاعة الدكتورة".

واستكملت، "الدكتورة قالت أنا مش هعالجها ولا هديها فلوس وابنها المحامي جه العيادة، وروحنا قسم الشرطه نعمل محضر ولكن عرفت إني هبات في الحجز فاتنازلت علشان منمش في الحجز واتعملنا محضر عدم تعرض للطرفين".

وتابعت، "بقول لابن الطبيبة المحامي: يرضي ربنا اللي حصل في وشي ده قالي آه علشان انتي قليتي أدبك"

واختتمت، "أنا عاوزة حقي ونفسي أتعالج، وما بقتش عارفة أقول أي لكل اللي بيسألني عن اللي في وشي ده".