هشام ماجد: والدي حببني في الزمالك ووفاته سببت لي صدمة

حل الفنان هشام ماجد ضيفًا على برنامج "أسرار" مع الإعلامية أميرة بدر المذاع على قناة النهار، وتحدث عن والده الراحل، وكشف سبب عدم ظهوره في البرامج التلفزيونية.

وقال هشام ماجد: "مبطلعش في برامج من نوعية الاستجواب، لكن جيت البرنامج ده لأنه لطيف ومفيش حاجة فجة زيادة عن اللزوم، وأنا قاصد الاختفاء لإني مش محتاج حد يعرف عن حياتي الشخصية حاجة، لإني ببيع للجمهور فن، لكن ملوش دعوة بعيلتي، ودي حاجات شخصية متتفتحش غير لناس قريبة، ومن حق النجم يعمل كده، وفي نجوم بتحب تعرض حياتها عادي".

وتابع هشام ماجد: "أنا خريج كلية هندسة، وأسرتي متوسطة مستورة، ووالدي كان دكتور وتوفي وأنا 13 سنة ووالدتي مدرسة، واخواتي شيرين أكبر مني بسنة ومحمود أصغر مني بـ 8 سنين، وبعد وفاة والدي ابتدت الدنيا تقل شوية، لكن والدتي عمرها ما حسستنا إننا ناقصنا حاجة، وفاة والدي أثرت في حياتي لإنه كان قريب مني، وأنا كنت في سن صغيرة، وده حصلنا كلنا، من الناحية المادية والنفسية برضو".

والد هشام ماجد زملكاوي ووسيم

وأضاف هشام ماجد قائلًا: "مش هعيط بعد شوية على فكرة، واللي يعرف والدي كان يقولي أنه زملكاوي ووسيم وأخف دم في العالم، وكان بياخدني معاه ماتشات كورة وحببني في الزمالك، كان تعبان فترة طويلة وفي يوم بلغونا أنه توفى، وحصل لي تروما (صدمة) لأن الموضوع حصل فجأة، ودي نقطة تحول في حياتي لأن شكل حياتنا اتغير، ووالدتي بقى عليها حمل كبير".