هشام ماجد عن العمل مع شيكو وأحمد فهمي: "عمرنا ما هنرجع ثلاثي"

كشف الفنان هشام ماجد عن بدايته العمل الفني مع الثنائي شيكو وأحمد فهمي، كما تحدث عن إمكانية تعاونهم مرة أخرى.

“كنا بناخد على الحلقة 1100 حنيه”

وقال ماجد، خلال لقائه ببرنامج “أسرار” للإعلامية أميرة بدر، "لما عملنا ورقة شفرة كان كل واحد بيشتغل جنبه شغلانة مختلفة، وكنا سايبنها على الله، وأول واحد أدالنا فرصة هو محمد حفظي، وأول حاجة عملناها كانت أفيش وتقفيش، كنا بناخد على الحلقة على الكتابة 800 جنيه وتمثيل 300 جنيه، وشيكو كان رافض الشغل معانا وكان عايز يكمل مهندس، وهو كان عنصر مهم جدًا، وهو أقوى واحد فينا في التمثيل".

“أصحاب من الجامعة”

وتابع: "إحنا أصحاب من الجامعة، ولما جينا نعمل الرجل العناب فيلم، بعد ما عملناه مسلسل خلاص، أتفقنا إن أحمد فهمي هو اللي هيكتب هو وشريف نجيب بس، عشان ميحصلش مشاكل، ولما فهمي كتب الفيلم، انا وشيكو كنا عندنا اعتراضات على الفيلم، وفهمي شاف إن ده عدم تقدير له، فـ قفشنا في الجزء ده، وقررنا إننا منعملش الفيلم سوا، وفهمي قرر أنه ينفصل ويشتغل لوحده".

“ممكن نشتغل إحنا التلاتة”

وأضاف ماجد، "كان بقالنا كتير بيحصل خناقات بس ومبتبانش للناس، وطول الوقت كان فيه اختلافات، ومفيش فرقة مبيحصلش فيها اختلافات، ومحدش بيكمل، وقليل اللي بيكمل، يعني بيتلز مكملوش، أما حصل نفس الكلام، وبرضو بنتخانق أنا وشيكو بس مبتوصلش إننا ننفصل، وممكن نشتغل مع بعض إحنا التلاتة، بس منرجعش نبقى فرقة تاني، لإن خلاص كل واحد عمل شغل لوحده ونجح".