دفنوه بشهادة وفاة مزورة.. أسرة عامل مصنع تستغيث: "مات بالصعق الكهربائي ومعانا الدليل"

شهدت مدينة 6 أكتوبر في الجيزة، واقعة مأساوية بعدما لقى عامل مصرعه؛ إثر تعرضه لصعق كهربائي داخل مصنع مواسير بلاستيك في المنطقة الصناعية، وازدادت المأساة عندما زعمت أسرة  الشاب أن نجلهم توفى بالصعق الكهربائي، وقامت إدارة المصنع بتزوير تقرير الوفاة.

"كان ماشي في الشارع بيودع الناس" 

وقال الحاج مجدي والد الشاب عدلي المتوفى داخل المصنع، في تصريح لـ"تليجراف مصر": “ابني كان شغال في مصنع مواسير صرف صحي ومياه في المنطقة الصناعية في أكتوبر من حوالي 5 أو 6 سنين، واليوم اللي توفي فيه كان رايح الشغل وماشي في الشارع بيسلم على الناس كأنه بيودعهم، وراح الساعه 9 ونص ركب العربية وراح على شغله”.

شغل السخان ومات بعدها بثانية 

وأضاف والد المتوفى: "هو وصل شغله ووقف على المكنة اللي بيشتغل عليها، وشغل السخان، والسخان ده بيبقى واصل له كهرباء 3 فاز، هو يا دوب حط إيده على المكنة، وفي ثانية راح واقع على الأرض، ساعتها زمايله في الشغل جريوا عليها وفصلوا المكنة وحاولوا إنهم ينقذوه لكن مفيش فايدة كان أمر الله حصل، وطلبوا الإسعاف وراحوا بيه على مستشفى خاصة المصنع متعاقد معاها".

“قوم يا ابني رد عليا” 

وأكمل والد المتوفى: "زمايله اتصلوا بالمدير بتاعهم والمسؤول عن المصنع، وجريوا وسبقونا على المستشفى قبل ما إحنا نروح، واتصلوا بيا قالولي ابنك وقع في الشغل ومات وهو في المستشفى حاليًا، وجريت على المستشفى ودخلت الأوضة اللي فيها ابني لقيته متغطي ببطانية وميت، بقيت أقوله يا ابني طب قوم يا حبيبي قوم في إيه طب قوم قولي إيه اللي حصلك".

“خد ابنك وامشي بدل ما يتبهدل” 

وأوضح والد المتوفى: "المسؤول عن المصنع قالي خد ابنك وامشي بدل ما يتبهدل،  وفي الوقت ده مرات ابني الكبير اكتشفت موضوع الكهرباء وقالت لأ عدلي ميت بالكهرباء"، وساعتها المسؤل عن المصنع قالها بقولك إيه إنتي هتهيجي الدنيا، اسكتي بدل ما أجيبلك الشرطة، قالتله هات الشرطة، بس طبعاً هو عارف ايه سبب الوفاة وحاول يهدي الدنيا وياخد ابني في عربيته ويروحه البيت".

“خفت من التشريح” 

وأكمل: “الناس خوفوني من تشريح ابني وقالولي ابنك هيتبهدل في المشرحة وأنا خفت، وكتبنا التقرير وخدت ابني ومشيت من المستشفى، واتكتب في التقرير وفاة طبيعية”.

ناس قالتلي ابنك مات من الكهرباء 

وأكد والد الضحية: “بعد يومين من الوفاة جات ناس من زمايله في الشغل وقالولي يا عم مجدي انت ازاي دفنته وابنك مات من الكهرباء، قولتلهم متكهرب ازاي، قالولي المكنة اللي بيشتغل عليها كهربتها 3 فاز وهو اتكهرب منها ومات”.

الفيديو ظهر الحقيقة 

وأوضح والد المتوفى: “بعدها بيومين لقيت واحد بيقولي إحنا عايزينك تيجي تشوف الفيديو في المصنع، وبعت أحمد ابني راح هناك، ابتدى يصور الفيديو من أول ما ابني دخل على المكنة لغاية ما وقع لغاية وزمايله شالوه، وظهر فعلًا ان ابني أول لما شغل المكنة اتكهرب ووقع ميت”.

محضر في النيابة العامة

وأضاف والد الضحية: “أنا عملت محضر في النيابة، والنيابة واخدة إجراء وهتبعت لجنة من السلامة والصحة المهنية للتفتيش على المصنع، وانا متأكد ان ابني مات بالكهرباء ومستعد أتحمل مسؤولية أي كلمة بقولها، ومستني الطب الشرعي ينزل ياخد عينة منه من قبره ويقفل تاني”.

عايز حق ابني 

واختتم والد الضحية حديثه قائلًا: "أنا عايز حق ابني مش عايز حاجة تانية، هم مطلعين عليا إني عايز فلوس، والله ما عايز فلوس، أنا عايز حق ابني، عاوزه ينام مرتاح، بس ده اللي عندي وده اللي أنا عايزه".

اقرأ أيضًا: 

وفاة شاب صعقا بالكهرباء في قرية سياحية بالعين السخنة.. وسط اتهامات بالإهمال (خاص)

مصرع شاب صعقًا بالكهرباء أثناء الصيد في ترعة بالحبيل شرق الأقصر