أسامة حسن: جون إدوارد نجح في الزمالك ومشّى الأسطورة الوهمية

شن أسامة حسن، لاعب الزمالك السابق، هجومًا على منتقدي جون إدوارد، المدير الرياضي السابق للنادي، مؤكدًا أنه نجح في اتخاذ العديد من القرارات المهمة داخل القلعة البيضاء، في ظل الظروف الصعبة التي يمر بها النادي.
وقال حسن في تصريحات عبر صفحته على الفيس بوك:" هو جون إدوارد، كان موجود ساعة زيزو لما المجلس فرط فيه؟ ولا استفدنا منه فنيًا ولا ماديًا وضيع علينا 300 مليون؟ هل جون كان موجود؟ لا".
وتابع: “جون لما جه النادي عمل إيه؟ حط إيده على أهم حاجة، أوضة اللبس، ومشى الأسطورة الوهمية اللي ولا فادنا فنيًا، وبعد ما بطل، قولولي عمل إيه لنادي الزمالك؟”.

وأوضح: “ما تنجموش حد، إنتوا النجوم والله العظيم، نادي الزمالك بس هو اللي نجم والجمهور طبعًا، النجم ده بيستفيد ماديًا وفنيًا وبياخد شهرة، بيستفيد، ومستفاد كله”.

وأضاف: “شال أوضة اللبس، وشال إداريين من الناحية الإدارية، وشال من الناحية الطبية، وشال من ناحية المهمات، وشال النجم اللي بيسرب كل حاجة، فأصبح نادي الزمالك سنة كاملة، ودي ما حصلتش في تاريخ نادي الزمالك، مفيش أخبار بتتسرب، هل ده مش نجاح لجون؟”.

أسامة حسن: جون اتخذ قرارات لم يجرؤ أحد على اتخاذها

وعن قراراته في النادي قال:" خلى الفريق يخرج من النادي ووداه الكلية الحربية، عشان الأخبار كلها كانت بتتنقل من جوه النادي، من الإدارة".

وأضاف: “راجل اشتغل مع قوة فنية وقوة مادية وقوة منشآتية وقوة إعلامية رهيبة، بيراميدز والنادي الأهلي، وقدر ياخد قرارات محدش قدر ياخدها”.

وأوضح: “من ضمن القرارات لما المجلس شال إيده وقفلوا تليفوناتهم لما اللاعب كان عايز فلوس قبل يناير وكانوا متصدرين الدوري. وتصدر الدوري ده خطر على الإدارة، لأن الجمهور هيقول: فين فلوس اللعيبة؟ اللعيبة تعبت وخدت دوري، فين فلوسهم؟”.

وتابع: “اضطر ياخد قرار تاريخي ببيع ناصر ماهر ودونجا، وإنت فين؟ في وسط الموسم وراكب الدوري، قدر ياخد القرار ده، وقدر يوصل نهائي الكونفدرالية في ظل الظروف الصعبة، وفي ظل إن كله شال إيده”.

وقال: “في ظل الاتهامات الرهيبة من الزملكاوية على القنوات كلها، بيطعنوا في شرفه وبيطعنوا فيه، وخد دوري عام وأقوى دوري وأصعب دوري في ظل القوة المالية الموجودة في البنك الأهلي والمصري وسيراميكا وبيراميدز والأهلي”.

أسامة حسن: جون لم يجامل وقرر تغيير الجهاز الفني

وأشار لاعب الزمالك السابق إلى قرارات جون إدوارد بشأن الجهاز الفني، قائلًا: “قدر يصحح غلطته، كلنا بنغلط، جاب المدرب فيريرا، جابه، وحش؟ شاله، شاله وجاب معتمد، وجون صاحي وفاهم، فاهم الدوري ده اتاخد إزاي وجه إزاي والكلام ده كله، فمش عايز يجامل، لازم يمشي ده كله، وعايز يعمل شركة كرة”.

وواصل: “في ناس في الإدارة بتطلع تتكلم دلوقتي، كانوا مستخبيين في الجحور وما عملوش حاجة، الزملكاوية على القنوات والفضائيات والإعلام وفيسبوك وتويتر ماسكين جون قبل ما يمسك، ماسكينه بوم بوم بوم، ولما كسب ونجح كله استخبى”.

واختتم: "ولما مشي دلوقتي يقولك: إلحق، هو بيحرض مين؟ بيحرض لاعب عقده ساري تلات سنين؟ بيحرض لاعب كان جايبه بـ2 مليون دولار جاب فيه 6 مليون دولار؟، يا ريت كلنا جون والله العظيم، إحنا آسفين يا جون بجد، ده حقك وكان لازم أديهولك، وإن شاء الله كل التوفيق لأصعب سنة في تاريخ نادي الزمالك، وربنا يستر".

اقرأ أيضًا..

وزارة الرياضة: اتحاد الكرة لم يطلب استضافة أمم إفريقيا 2028 حتى الآن