"شقايا ضاع وصعب أعوضه".. صاحب الكافيه المتضرر من حريق دار السلام يروي مأساته

شهد ميدان المطبعة بمنطقة دار السلام في القاهرة، اليوم الثلاثاء، حريقًا هائلًا بعدما اندلعت النيران داخل محل أطفال، قبل أن تمتد إلى كافيه وصيدلية ومطعم، ما أسفر عن مصرع شخصين وإصابة آخرين.

صاحب الكافيه يروي لحظات الرعب

وقال سامح سمير، صاحب الكافيه المتضرر من الحريق، إن الحريق وقع في حوالي الساعة الواحدة فجرًا، وبدأ بانفجار جامد أوي، على حد وصفه.

وأضاف لـ"تليجراف مصر": “كلنا طرنا من شدة الانفجار، حريقة في محل أطفال ”2 ونص"، والصيدلية في الدور الأول، ونزل على القهوة عشان القهوة دي تحتيهم".

أنبوبة أكسجين ولا غاز؟

وتابع صاحب الكافيه: “الانفجار حصل في محل الأطفال، ممكن تبقى أنبوبة أكسجين، أنبوبة غاز، الله أعلم.. انفجار جامد أوي، مانعرفش السبب”.

خسائر بالجملة

وعن حجم الأضرار التي لحقت بالكافيه، أوضح سامح سمير: “الشاشات، والشيش، والترابيزات، والكراسي.. كل ده اتحرق واتدمر”.

وأضاف أن الحريق استمر لمدة تقارب نصف ساعة حتى وصلت سيارات الإطفاء، قائلًا: “الحريق فضل بتاع نص ساعة لغاية ما المطافي جت وكملت، الحريق كان كبير أوي، فوق ما تتخيل، وكان هيكمل على العمارة كلها لولا المطافي”.

3 محال تضررت من الحريق

وأوضح صاحب الكافيه أن أبرز الأماكن المتضررة من الحريق هي المحال الموجودة أعلى الكافيه، قائلًا: “المتضررين المحلات اللي فوق اللي هي الصيدلية ومحل أطفال 2 ونص وأنا، هما دول التلاتة المتضررين وآثار الحريق امتدت لمسافات بعيدة، وتسببت في كسر إزاز أتوبيسات".

"محتاج أرجع الدنيا زي ما كانت"

واختتم سامح سمير حديثه بالتأكيد على حجم الخسائر التي لحقت بالكافيه، قائلًا: “شقاي ضاع، ومحتاج إن أنا أرجع الدنيا زي ما كانت، وده صعب، دي طبعًا حاجات بفلوس وأرقام كبيرة”.

اقرأ أيضًا:

من محل ألعاب إلى مأساة.. 3 ساعات جحيم في ميدان المطبعة بدار السلام