جميلة عزيز: "بشتغل مدرسة فرنساوي عشان أعرف أعيش"

كشفت الفنانة جميلة عزيز، عن مصدر دخلها بعد ابتعادها عن الفن، موضحة أنها لا تمتلك أي واسطة في الوسط الفني.

وقالت جميلة عزيز، في لقائها مع الإعلامية إنجي هشام، في برنامج "المنسي" المذاع عبر شاشة قناة "هي": “أنا بدرس فرنساوي، وكل إنسان بيحاول يتأقلم على الدخل اللي بيجي له، وطبعًا بيختلف بين دخل التمثيل ودخل التدريس”.

وأضافت “أنا بتأقلم على الدخل اللي بيجيلي وبعيش على قده، وأنا مبقبلش دور أنا مش شايفة نفسي فيه أو مش مناسب ليا، وعمري ما قبلت أدوار علشان الفلوس، والأدوار اللي بعملها حباها ومقتنعة بيها، وبقعد مع المؤلف والمخرج ونغير في الدور ونخليه مناسب ليا”.

وتابعت: “الوسط الفني لو مسعتيش لوحدك مش هتشتغلي، مفيش واحدة بتساعد واحدة في الوسط الفني، واللي ممكن يساعد هي النقابة، إنما لو صديقتك وحبيبتك تقوليلها عايز أشتغل تقولك مفيش، ويجيبوا واحدة تاني بس انتي وصاحبتك لأ، ودي نفسيات، يعني الصاحبة متجبش صاحبتها ليه الله أعلم، وأنا بالنسبة ليا متفرقش”.

وأكملت: “وفيها إيه لما تفتح باب رزق لحد؟ ده عند ربنا حاجة حلوة، وربنا هيفتحلك 10 أبواب رزق، إنما النفسيات واللي جوا النفسيات بيختلف”.

وأردفت: “أنا كنت برشح فنانات لأعمال، وعملتها كذا مرة وأنا هخسر إيه؟، وهما دول اللي مرشحونيش في أدوار، وأنا مش منتظرة منهم حاجة، والنصيب مكتوب، إنما البني آدمين عامل مساعد ووسائل مش أكتر ولا أقل”.

وبرنامج المنسي، من تقديم الإعلامية إنجي هشام، على شاشة قنا هي، ويُعرض يوميًا في تمام الساعة العاشرة مساء، طوال شهر رمضان.

ويحل عدد من نجوم الفن ضيوفًا على برنامج المنسي، للحديث عن بداياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.