بعد تألقها في لعبة جهنم.. غادة طلعت: شخصية نوال حقيقية وأنا مش ممثلة إغراء (حوار)

لفتت الفنانة غادة طلعت أنظار الجمهور، خلال الأيام الماضية، وذلك بعد تقديمها شخصية "نوال"، في حكاية "لعبة جهنم"، بطولة الفنان محمد فراج، الدور الذي صدقه الجمهور وتفاعل معه بل وأخد يردد كلماتها، حيث أعده الكثير إضافة جديدة في مشوارها الفني.

وفي السطور التالية تتحدث غادة طلعت، في حوار مع “تليجراف مصر”، عن تفاصيل هذا الدور وكواليسه وبداية ترشيحها وردود فعل الجمهور.

شخصية "نوال".. حقيقة وحوالينا

عن شخصيتها في العمل قالت: “أنا حبيت شخصية نوال لما قرأتها عشان هي حقيقة موجودة حوالينا بشكل كبير جدا، في اللي الفقر والغدر دفعهم أنهم يشتغلوا شغل غير مشروع ويبيعوا أجسادهم وبشوفهم في الشوارع كتير وده مش مبرر، ونوال هي بالنسبة لي ضحية وبالرغم من أن مشاهدها قليلة إلا أن الصناع وضحوا دورها وأعطوها فرصة إنها تتكلم عن نفسها وتوضح هي ليه عملت كده وقلبت مجرمة من نوع تاني خالص".

وعن تصوير المشاهد قالت: “المشاهد مكنتش صعبة ولكن أنا قبولي الدور كان محتاج جرأة مني ومغامرة واتعرض علي النوع ده من الأدوار ورفضته كتير لأنه مكنش متوظف كويس وكنت خايفة من رد فعل الناس والجمهور بيكون عنده خلط بين شخصية الفنانة وشخصية الدور اللي بتعمله”.

وتابعت: " جالي ردود أفعال لوم على إني قدمت الشخصية دي ومش عايزين شخصيات زي دي تكون موجودة في الدراما وأنا مش عارفة ليه مع إنها شخصيات حقيقة موجودة حوالينا وأشخاص نعرفها بيعملوا كده".

إسلام خيري سبب النجاح 

وعن قبولها للشخصية قالت: “جذبني للقصة والمشروع كله الأستاذ إسلام خيري، هو اللي خلاني أعمل شخصية زي دي وثقتي في صدقه وأمانته أنه مش هيعمل حاجة مبتذله، ولما قرأت الورق قلبي اتقبض جدا واتفزعت".

وتابعت: بعد العرض تفاجأت إن فيه ناس بتلوم أن المسلسل اتعمل هو بيوعي الناس أنها تاخد بالها من عيالها فهو مهم جدا وتوقيته مهم  وأنا شفت نجاحه لأن إسلام خيري أخرجه بشكل جيد والأستاذة نجلاء الحديني كاتبة بشكل كويس جدًا”.

محمد فراج ممثل متلون 

وعن الفنان محمد فراج قالت: "من ضمن الحاجات اللي فرحتني جدا  أن البطل هو محمد فراج لأني عارفة قد إيه هو ممثل مهم جدا ومتلون والتقمص عنده عالي جدًا والأدوار النفسية هو شاطر فيها جدًا من بدري، وفرحت إن نوال مشاهدها هتكون معاه".

وتابعت: “ أول مرة شوفته في الكواليس اتخضيت أوي وانبهرت بشكله وتقمصه للشخصية وهو على المستوي الإنساني بسيط وملتزم وبيحافظ على اللي قدامه وعايز الناس كلها تبقى حلوة وكان جميل وذوق معايا وإحنا بنراجع ونقرأ .. فهو فنان بمعنى الكلمة".

وعن نجاح الحكاية قالت غادة طلعت: "كنت متوقعة جدًا نجاح الحكاية بس مكنتش متوقعة إن الناس هتحب شخصية نوال وتردد الجمل بتاعتها وطبعا توقعت النجاح عشان إسلام خيري وفراج وردود الأفعال الإيجابية بالنسبة لي مدهشة لأن الناس كتبت لي أن أول مره نشوف أدوار إغراء مش ابتذال".

إشادة مميزة من مخرج كبير 

وعن إشادة المخرج خالد جلال بها قالت: “ أنا أول ما قرأت تعليقه دموعي كانت بتنزل وكل الكلام مش هيوصف سعادتي باللي قاله الأستاذ خالد جلال، لأنه قيمة فنية كبيرة جدًا وأستاذ عظيم وأهم النجوم كانوا تحت إيده واللي بيقوله خالد جلال كله عارف أنه مش مجاملة وكنت سعيدة جدًا إني مخيبتش ظنه وشايفني فريدة وبالنسبة لي دي أحلى جائزة في حياتي".

وعن تقديمها لأدوار مماثلة قالت: " مش عايزة أعمل حاجة أندم عليها أو أهلي يبقوا مضايقين منها أنا عايزة أعمل فن حقيقي ورفضت أدوار كتير جدًا عشان محدش يصنفني، وحاولت أعمال تعديل زي الاختيار، قدمت فيه أم أحمد داش وزوجه الإرهابي وكنت لابسة خمار ومن غير مكياج فهدفي إني أقدم حاجة حقيقة مش الإغراء".

اقرأ أيضا: 

بعد ظهورها في "لعبة جهنم".. توانا الجوهري تفاجئ الجمهور وتتصدر الحديث

عمرو محمود ياسين يعلن مشاركته في "القصة الكاملة دراما".. ويكشف موعد انطلاق «لعبة جهنم»

ماجدة خيرالله: لعبة جهنم محبوكة وفراج يتميز بالأدوار المعقدة (خاص)