ميار الببلاوي عن "عُري ديسكو": نجلاء فتحي قالتلي "رمضان للفقراء بس"

ردت الفنانة ميار الببلاوي خلال استضافتها في برنامج “العرافة” مع الإعلامية بسمة وهبة، على انتقادات وجهتها لها إيناس الدغيدي بشأن ارتدائها الحجاب.

وقالت الببلاوي، "أنا دعيت على إيناس علشان كنت رافضة مشاهدها بفيلم ديسكو، والقصة الحقيقية أنا كنت رافضة أعمل كل المشاهد دي بالفيلم، زي إني رافضة ألبس المايو، ولا مشهد عمرو عبد الجليل، ولا مشهد شريف منير، والحجات دي كلها عملت لي مشاكل، والحمد لله اتحجبت ومش عايزة حاجة زي كدا تتعرض، ولا حد يجيب سيرتها، والمشاهد دي لا يصح ذكرها في رمضان".

وعن سبب قبولها الفيلم، أوضحت "كنت بنت عندي 19 سنة، وفرحانة إني هدخل مجال التمثيل، وهمثل قدام نجوم كبار زي نجلاء فتحي، وماكنتش أحلم أشوفهم وجها لوجه فجأة لقيت نفسي بمثل معاهم، وكنت مطيعة جدا وحابه الموضوع جدا، والمشهد ده كنت خايفة لأن متربية في بيت متدين، وماكنتش محجبة وقتها، ولما دخلت أعمل المشهد طلبت يتعمل بعض الفطار رفضوا، وكنا بنصور في ديسكو تيك، وكنت أنا وأختي الوحدين اللي صايمين، وطول النهار كنا بنصور في الديسكو، والنجوم الشباب كانوا فاطرين".

وتابعت: "أنا هربت منهم دخلت الحمام، وقفلت على نفسي، وإيناس الدغيدي اتعصبت، والدنيا انقلبت عليّ، لأنهم رفضوا إنهم يقعدوا الساعتين اللي قبل الفطار من غير تصوير علشان المشهد بتاعي، واقنعتني نجلاء فتحي وعملت المشهد وقالت ليّ رمضان دا بتاع الفقراء بس، علشان بس نحس بهم وبالجوع، والموضوع هيعدي".