فتاة استدرجته وشقيقها ادعى أنه ضابط.. نجاة شاب من فخ النصب بالتجمع

كشف شاب يدعى “إسلام خالد” تفاصيل تعرضه لمحاولة نصب واختطاف من شخص انتحل صفة ضابط شرطة بمنطقة التجمع الخامس.

اتفاق على عمل مع سيدة

وقال إسلام في منشور عبر صفحته على موقع التواصل الاجتماعي “فيسبوك”: “أنا ربنا أنقذني من عملية نصب كانت ممكن توصل للاختطاف، اللي حصل إن رقم بعتلنا على واتساب الشركة إنه محتاج شغل مننا، وبعد اتصال تليفوني حددنا موعد المقابلة في كافيه في التجمع الخامس، ودا لأن العميلة حسب كلامها مستعجلة، وأنا النهارده مكنتش فاضي غير بعد الساعه 8 فالشركة مكانتش هتكون خيار مثالي”.

وأضاف صاحب المنشور: “اتفقنا على الموعد الساعه 9 وصلت أنا 9 و ربع وكلمتها قالت قدامي سبع دقايق بالظبط وأكون عندك، دخلت قعدت في الكافية اللي اتفقنا عليه وانتظرت، عدى نص ساعه مجتش، فكنت لسه هقوم أمشي وفجأه دخل واحد وقعد معايا على نفس الترابيزه وعرفني بنفسه وقال أنا المقدم محمد خالد مباحث التجمع الأول، قولتله أهلا بيك أؤمرني”.

محاولة اختطاف من شخص ينتحل صفة ظابط 

وأكمل إسلام: “لقيت الراجل بيقولي ممكن تيجي معانا القسم قولتله خير قالي مفيش حاجة بسيطة محتاجينك فيها، وعرفته بنفسي وبشغلي وطلبت منه إثبات شخصية فالولد بدأ يهتز كدا وقالي مش هنأخرك موضوع سريع وهتمشي على طول، قولتله ممكن الكارنيه بتاعك قالي في العربية قولتله استئذنك تجيبه وتيجي وأنا معنديش مشكل’”.

وأوضح صاحب المنشور: “بعد ما قولتله هات الكارنيه لقيت اتنين شكلهم مخبرين داخلين عليا فقالهم استنوني بره قال يعني بيحبك الدور، وقومت قايله عشان معملش دوشه اتفضل إمشي وناديت الجارسون، وهو طلع جري ومشي”.

الظابط المزيف شقيق العميلة

وأكمل: “بعدها اتصلت بالأستاذة اللي كنت هقابلها ومردتش وبعتتلي رساله بتقولي فيها أنا بعتذر لك جدًا أختي في البيت وقعت من طولها وعماله أكلم في الدكاتره وسايقة ومش عارفة حتى أبعت رسالة، من هنا بدأت أشك فيها وتتبعت رقم تليفونها لحد ما وصلت للأكونت بتاعها والمفاجأة كانت إن الولد اللي دخل عليا عامل فيها ظابط طلع أخوها”.

تسجيل كاميرات المراقبة

واختتم إسلام منشوره قائلًا: “أنا قبل ما أمشي من الكافيه طلبت تسجيل كاميرات المراقبة وقالولي إنهم هيبعتوه لي بكره وأخدوا رقم تليفوني، وانا مستنى التسجيل عشان أول لما يكون معايا هتحرك وأعمل بلاغ”.

الأمن يفحص المشور

ومن جابنها تعمل الأجهزة الأمنية بوزارة الداخلية على فحص المنشور للوقوف على ملابسات الواقعة، وضبط القائمين على ارتكابها لاتخاذ الإجراءات القانونية حيالهم. 

اقرأ أيضًا: 

"أنا سرقت بس".. الداخلية تكشف حقيقة فيديو ضبط شاب متهم بسرقة طفل في المنوفية