ميار الببلاوي: جوزي ضايقني وحبسته.. مقدرش استغنى عنه

كشفت الفنانة ميار الببلاوي عن شهرتها الواسعة خلال المرحلة الجامعية، وأيضا عن أسباب تعدد زوجها، وانفصالها عن زوجها الأولى إحدى عشر مرة.

وقالت الببلاوي، خلال استضافتها ببرنامج “العرافة” من تقديم الإعلامية بسمة وهبة، ويعرض عبر قناة "المحور" عقب أذان المغرب مباشرة، "طبعا مكنتش عادية في الجامعة، وكنت محط الأنظار، لأني كنت الأولى على دفعتي، وكنت بشتغل في الإعلانات فكنت محط أنظار الناس كلها".

علقت الببلاوي عن تعدد زيجاتها والتي وصلت إلى خمس مرات بقولها: “الزواج حاجه شخصية، والسؤال المهم هل تزوجت بالحلال أم بالحرام، ومليش في الحرام والله، واتجوزت زي ما ربنا كتبلي على سنة الله ورسوله، ومش هقول على العدد علشان بيتحسدو،  واتكرر علشان حقيقي تعبت، وفي أربعة معلنين والأخير كان رجوعي لواحد منهم”.

تابعت، "عمري ما اتجوزت في السر، ومشكلتي إني لما بتجوز بقول لكل الناس، وزوجي اللي على ذمتي حبسته قبل كدا، وهو كان مضايق إني مشيت من البلد اللي كنا متجوزين فيها من غير ما يعرف، وأنا كنت عايزه عايزه امشي وأخدت ابني ومشيت، ورحت رفعت عليه قضيه وحبسته، وطلقني كتير، واتجوزنا كتير، وقلبي وجعني لأن دا واحد حبسته وكان أول راجل حبيته واتجوزته في حياتي، ولكن مكنش ينفع نخلف، وكان نفسي يكون عندي ولد فاتطلقت علشان أخلف، لو فكرت يكون في حياتي راجل أكيد هيكون هو".

أضافت الببلاوي، "أنا وزوجي انفصلنا 11 مرة، وكان بسبب مشاكل، ومسمحش حد يقول كلمة محلل، ومبحبش اسمعها، وأنا لا بتاعت محلل ولا بعمل كدا، والراجل دا حياتي، وبصراحة أنا وهو عصبيين جدا، وكل مرة بتحصل كوارث، ومش منه ومني بالعكس من اللي حوالينا، زي ما يكونوا مستكترينه عليا والعكس برضو".

أردفت، "الجواز دلوقتي رسمي لكن غير موثق في بلده، ودا علشان حصل مواقف قبل كدا وطبعا مش عايزاها تتكرر، وأنا المهم عندي أنه في بلدي موثق وأنا كدا تمام".

ملكة الإفتاء

كما أطلقت الإعلامية بسمة وهبة خلال الحلقة على الفنانة ميار الببلاوي لقب "ملكة الافتاء"، لترد عليها الثانية “يعني إيه ملكة الافتا، هو دا تريقة”، فعزمت “العرافة” على توضيح سبب اللقب عقب انتهاء البرنامج.