مسلم: اسمي لوحده تريند.. ورجعت لخطيبتي عشان مستحملتش أبعد عنها

كشف مطرب المهرجانات مسلم، تفاصيل عودته لخطيبته السابقة يارا، والتي انفصل عنها بعد أيام قليلة من إعلان الخطوبة.

وأعلن مسلم حصريا لبرنامج "أسرار" ، الذي تقدمه الإعلامية أمير بدر على شاشة "النهار"، أنه عاد مرة أخرى لخطيبته السابقة والتي وقفت بجانبه كثيرا.

واضاف مسلم: خطبت بعد طلاقي بـ7 شهور، لأني حبيت من قلبي مش بعقلي، والمرة اللي فاتت كانت اختيار الناس وأني اقعد في البيت وأتجوز وممشيش غلط، وكلنا بنغلط وكلنا خطائين، واللي خطبتها من برة المجال الفني، ومحترمة من عيلة، واتظلمت معايا، وكانت بتستحمل، والناس افتكرت إنها أخدتني من طليقتي وابني.

واستكمل مسلم: انا معملتش حاجة غلط وعملت خطوبة زي أي بني آدم ومجرحتش حد، وراعيت مشاعر طليقتي وعمري ما هجرحها لأنها أم ابني، وكنا مطلقين ومش قايلين لحد، ولما بدأنا نشوف حياتنا قلنا نعلن عشان الناس تعرف، الناس قالت خطوة سريعة، ولكن حسيت مع خطيبتي بحاجات محستهاش مع اللي قبلها، حبيت أن ثقتي في نفسي زادت وقبل كده مكنتش عايش حياة.

وأضاف مسلم أنه عاد مرة أخرى لخطيبته بعد إعلانه فسخ الخطوبة: ده تسرع مني وأنا اللي نزلت إننا فركشنا، وأنا مش محتاج أعمل تريند عشان أتشهر، بندم إني عرفت للناس تفاصيل حياتي الشخصية بس اتعلمت، وأنا بني آدم عايز أحب وأعمل أسرة وحياة.

مسلم: مستحملناش  نبعد عن بعض أنا وخطيبتي

وقال مسلم: احنا رجعنا لبعض لاننا مستحملناش نبعد عن بعض، ومرضيناش نقول إننا رجعنا، عشان الناس ماتفتكرش إننا بنعمل لقطة ولا تريند، ومش حابب حد يحطها في الحتة دي لأنها أنضف من كده، وناوي إننا نعقل ونكبر ومنتسرعش في أي حاجة بعد كده، أنا اللي اتقمصت شوية وموقف حصل ولكنها مسابتنيش زعلان في عز ما أنا غلطان، احترمتها.

مواعيد عرض برنامج أسرار

برنامج "أسرار" يعرض يوميًا على شاشة "النهار " تستضيف خلاله الإعلامية أميرة بدر، عددًا من نجوم الفن والرياضة والسياسة والمجتمع، في تمام الساعة التاسعة والنصف مساءً.
 

مسلم يعلن عن انفصاله من يارا تامر

وأعلن مطرب المهرجانات مسلم انفصاله رسميًا من يارا تامر، وذلك بعد فترة قليلة جدًا من احتفالهما بالخطوبة، وحذف جميع الصور التي تجمعهما معًا، وكتب مسلم عبر خاصية “ستوري” بحسابه الرسمي بموقع الصور والفيديوهات انستجرام، قائلًا: خلصت يا جماعة، مشيرًا إلى انفصاله من يارا.

حفل خطوبة مسلم ويارا تامر

وكان كل من مسلم ويارا تامر، قد احتفلا بخطوبتهما بقصر البارون في حفل كبير، بحضور عدد كبير من الفنانين والأقارب.

طلاق مسلم

وهذه ليست المرة الأولى التي يعلن فيها مسلم عن انفصاله، بل أعلن منذ فترة قصيرة طلاقه من ميكا البغدادي ، وذلك عبر حسابه الرسمي بموقع الصور والفيديوهات انستجرام، قائلًا:" الحمد لله على كل شيء، الحمد لله تم الطلاق رسمي بيني وبين ميكا البغدادي، للأسف مكنتش أحب تكون دي النهاية، ويعلم ربنا إني راعيت الله فيها وتمسكت ببيتي أكثر من مرة."