والد الطفل يوسف عن واقعة فقدان بصره بسبب زميله: اتنازلت عن المحضر.. وكان نفسي يدخل حربية

كشف أمير متولي والد الطفل يوسف المصاب في عينه بسبب زميله أثناء لعبهما في إحدى المدارس ببورسعيد، تفاصيل إصابة نجله وكواليس طلب الأخير التنازل عن حقه لإنقاذ صديقه من العقوبة. 

القصة الكاملة لفقدان يوسف عينه على يد زميله

وقال متولى لـ"تليجراف مصر" إن الواقعة حدثت يوم الأربعاء الماضي أثناء لعب نجله يوسف المسجل بالصف الأول الثانوي، مع أحمد شريف زميله في المدرسة وأعز أصدقائه، والذي تسبب في إصابته إصابة بالغة أفقدته بصره دون قصد أو تعمد لإلحاق الأذى به. 

وأضاف والد يوسف: "وهما بيلعبوا يوسف كان لابس النظارة الطبية وأحمد كان ماسك فيشة كهربائية خبطها في نظارة يوسف دون قصد وزجاج النظارة اتكسر ودخلت شظاياه إلى عمق عين ابني، ما أدى إلى انفجار القرنية في عين وإصابة الأخرى.

وأشار متولي إلى أن نجله يوسف طلب منه التنازل عن المحضر وإخراج زميله المتسبب في إصابته، خاصة بعد قرار المدرسة بفصله لمدة عام كامل قائلًا: “إحنا معندناش روح العدوانية ويوسف قالي يا بابا طلعه ورجعوا المدرسة علشان اتفصل”.

تنازل عن المحضر ومحاولات لمنع الفصل من المدرسة

وتابع: "طلعت زميل ابني أحمد المتسبب في الحادثة من النيابة وتنازلت عن المحضر، وتواصلت مع وكيل وزارة التربية والتعليم ببورسعيد لعودة أحمد للمدرسة دون فصل استجابة لطلب ابني، دون طلب من أسرة أحمد".

وأردف: "أنا عارف إن الواقعة كانت هزار وهما بيحبوا بعض، ولكن أنا مصدوم من إصابة ابني، كان نفسي أدخله كلية الحربية أو الشرطة أو البحرية، ولكنه بقى معاق، وبليل بسمعه وأنا في الأوضة بيصرخ من الآلام".

واستكمل: "مسؤولي المدرسة مصدومين من اللي عملته إني اتنازلت في النيابة وبكلمهم علشان يرجعوا أحمد المدرسة، وأنا بعمل الواجب واللي الدين والرجولة بيقولوا عليه بس أنا هموت على ابني واللي حصله".

وتابع: “إحنا بنقفل أبواب الشيطان ومش عاوزين نفتح أبواب ليه، وأنا دلوقتي عاوز أهتم بابني وأشوف العملية اللي هتتعمله، هو محتاج قرنية بأكثر من 400 ألف جنيه، وأنا مش عاوز ضغط من الناس وكفاية كلام عن الصداقة والصحوبية أنا عايز حل لابني اللي عينه ضاعت”.

وتحدث متولي عن حالة زوجته المؤلمة قائلًا: "والدته بتموت عليه وكل ما حد يكلمها في حاجة يغمى عليها، وبحاول أتكلم معاها علشان تتماسك أكثر قدام يوسف".

وتابع: “كل اللي أنا محتاجه إن ابني يعمل العملية في مستشفى كويسة وياخد الرعاية الكاملة مع طبيب استشاري، وعاوز وزارة التربية والتعليم تقف معايا في أزمة ابني”.