"اترددت وهي بتعدي".. نص التحقيق مع نجل مصرفي تسبب فى وفاة طالبة (خاص)

حصل “تليجراف مصر” على نص التحقيقات مع نجل مصرفي شهير دهس بسيارته طالبة بكلية الطب تدعى" تسنيم عزت بسطاوي"، وتسبب فى وفاتها بطريقة مروعة بمنطقة التجمع الخامس.

بدأت الواقعة منذ 6 أسابيع تقريبًا، بتلقي قسم شرطة التجمع الخامس بلاغ من شرطة النجدة، بوجود حادث سير ومصابة بشارع متفرع من شارع التسعين بمنطقة التجمع الخامس.

وعلى الفور، انتقلت أجهزة الأمن إلى مكان الحادث، وتبين إصابة تسنيم عزت بسطاوي، 23 سنة ، طالبة بكلية الطب البيطرى بجامعه القاهرة، ونُقلت للمستشفى في حالة حرجة، حتى توفيت اليوم، وألقي القبض على المتهم.
 

نص التحقيقات

وجاء نص التحقيقات مع المتهم في القضية وهو نجل مصرفي شهير، كالتالي:

س: ما اسمك وسنك؟

ج: اسمي "عبد الله. أ. ع ".. سني 19 سنة ..طالب.

س: ما قولك فيما هو منسوب إليك من أنك متهم بالتسبب خطأ في إصابة المجنى عليها ؟

ج: محصلش.

س ما تفصيلات وقوع الحادث وما هي ظروف ضبط وعرضك علينا؟

ج: اللي حصل إن يوم 12 فبراير 2024.. حوالي الساعة 10 بالليل وأنا ماشي بالعربية بتاعتى عند تقاطع شارع الجزيرة في التسعين الجنوبي وعديت اليوترن وماشي في أقصى الشمال، اتفاجئت وأنا ماشي بسيدة تعبر الطريق من اليمين من قدام عربية تاني وكانت مسرعة، وترددت في العبور.

 وحاولت أفاديها ومعرفتش واصطدمت بيها وحدثت إصابتها، وأنا وقفت على طول ونزلت علشان اطمن عليها، لقيت فيها إصابات روحت اتصلت بالإسعاف وجات أخدتها، والشرطة جات وأخدوني وأخدو العربية، وجابوني على القسم، وأنا كلمت حد من أهلي علشان يتابع حالة المصابة، وفعلًا راحوا واطمنوا عليها واتكفلوا بكل المصاريف في المستشفى الجوي وعملوا المحضر وجابوني هنا النهاردا ودا كل اللي حصل.

س: متى و أين حدثت تلك المصادمة؟

ج: الكلام دا عند تقاطع شارع الجزيرة بالتسعين الجنوبي التجمع الخامس، الساعة حوالي 10 بالليل.

س: وهل كان بإمكانك تفادي وقوع ذلك الحادث؟

ج: لا

س:هل تعلم بمدى الإصابات التي تعرضت لها؟

ج: هو كان في جروح في وشها، ومعرفش باقى الإصابات اللي فيها علشان أنا مروحتش معاها المستشفى والشرطة أخدتني.

س: وما الذي حال دون ذلك ؟

ج: هي كانت بتعدي الطريق، وماشية بسرعة وانا اتفاجئت بيها قدامي.

س: ما الذي نتج عن تلك الحادث؟

ج : هو تلفيات في العربية بتاعتي وإصابتها.

س: وما هي طبيعة تلك التلفيات؟

ج: عبارة عن كسر الزجاج الأمامي وكسر الاكصدام وكسر بالمرأة بالجانب الأيمن وتطبيق بالرفرف الأمامي الأيمن وتطبيق بالكبوت.

س :ما طبيعة المساعدة التي قدمتها للمصابة؟

ج: أنا بعد الحادثة علطول وقفت العربية ونزلت علشان أطمن عليها، واتصلت بالإسعاف علطول.

س: هل توجه ثمة علاقة بالمصابة؟

ج: أيوة أخويا راح لها ومتابع حالتها ومتكفل بكل المصاريف اللي هتصرفها في المستشفى لحد ما تتماثل للشفاء

س: ما هى السرعة التي كنت تقود بها السيارة؟

ج: أنا كنت ماشي على سرعة بطيئة خالص علشان كنت خارج من الملف.

س: وما هي حالة الضوء والرؤية بالطريق؟

ج: الرؤية واضحة علشان في أعمدة انارة.

س: ما هي الحالة التي أبصرت عليها المجني عليها لأول وهلة؟

ج: هي كانت ماشية بتعدى الطريق وأنا كنت ماشى في أقصى الشمال علشان كنت هلف من اليوتيرن وكانت ماشية بسرعة، وأنا اتفاجئت بيها بتعدي من العربية اللى كانت على يمينى واترددت، وأنا حاولت أفاديها ومعرفتش.