"حاول قتلي عند المأذون".. سيدة تستغيث من بطش طليقها وملاحقته لأسرتها

تعيش سيدة تدعى “أماني أحمد محمد” حالة من الخوف والقلق، بعد طلاقها من زوجها الذي استمر 20 عامًا، مؤكدة في استغاثة لها أن طليقها يتعدى عليها وعلى أفراد أسرتها، ويوجه لها تهديدات بالقتل بشكل متكرر، وذلك بمنطقة شبرا الخيمة.

20 سنة جواز انتهت على إيد مأذون

وتقول أماني في تصريحات خاصة لـ"تليجراف مصر": "أنا متجوزة من 2005 ومطلقة في 2025، عشت معاه 20 سنة ومعايا 3 صبيان الكبير عنده 20 سنة والوسطاني 15 والصغير 11 سنة، وكنا كويسين لحد ما اتجه للمخدرات".

وأضافت: "يوم 31 / 3 أول يوم العيد الصغير اتصل بيا قال أنا عايز أطلق أنا عند المأذون، روحنا ودفعنا حق المأذون وبعد ما طلق على طول رفع عليا السكينة وقال أنا عايز أموتها، المأذون قفل عليا الباب الحديد واتصل بالنجدة ونزلت ببوكس من عند المأذون".

اتجه للآيس والشابو وباع عفش البيت

وتكمل أماني روايتها المأساوية: "هو كان شغال موظف في إحدى الجهات، ومن 5 سنين اتجه للآيس والشابو والباودر وبرشام صراصير يطحنه ويشمه، فضلت واقفة جنبه ووديته مصحة وأعالجه عشان خاطر العيال، كنت طالعة من تحت إيده ميتة مرتين، بيسرق حاجة الشقة حتة حتة ويبيعها، واستحملت لحد ما أهلي قالوا إحنا مش مستغنيين عنك".

أخد العيال وقلبهم عليا ومشغلهم

وتابعت: "بعد ما سيبته راح واخد العيال وبدأ يسحبهم ويقلبهم عليا، العيال قالوا لي إحنا مش عايزينك إحنا اتبرينا منك، قلت خلاص هتنازل عن كل حاجة عشان عيالي اللي قاعدين عليها، لا طلبت قايمة ولا أي حاجة".

وأوضحت: "باع عفش الشقة كله والعيال قاعدين على البلاط، ومشغل الواد الوسطاني معاه ومطلعه من المدارس سقط السنة اللي فاتت في تالتة إعدادي، والصغير مش بيوديه المدرسة ولا الدروس ومشغله عند حلاق وياخد اليومية بتاعته يجيب بيها سجاير".

بيطاردني في الشارع وخنقني بالطرحة قدام الناس

وعن واقعة التعدي الأخيرة تقول: "بعد الطلاق على طول يوم شم النسيم كنت رايحة الفرن أستخبى ورايا ومسكني ضربني قدام الناس كلها، جريت منه على الشارع العمومي جيت أركب توكتوك راح ماسكني في قلب الشارع خنقني بالطرحة وبهدلني وطلعت على القسم وما عملوليش حاجة".

وأضافت: "من بعدها وهو مبهدلني أنا وأهلي، إحنا مأجرين شقق في المنطقة بيمشي يتسلى علينا من صباحها لمساها، يقف تحت بلكونة خالتي يشتم ليل ونهار وهي ست كبيرة عاملة قلب مفتوح وسايبة شقتها وقاعدة عند بنتها من تحت راسه، ويروح عند أخويا يقف هو وعياله في الشارع يشتموا، يقابل مرات أخويا في الشارع يشتمها، يقابلني يفضل ماشي ورايا، أنا قاعدة من الشغل بسببه".

بلاغات ومحاضر

وتؤكد أماني: “عمل لي محضر كذب إن أنا ضربت ابني أنا وأهلي وأنا ما أعرفش حاجة، وعمل محاضر كتير، ورحت الاستيفاء ورحت مديرية أمن القليوبية”.

أنا مركبة هولتر في قلبي من التعب

واختتمت أماني حديثها باكية: "جبت له ناس كبيرة وقعدوا معاه وحكموا على أهله يدخلوه مصحة دخلوه وطلع نفس النظام، أنا آخر ما زهقت رحت مشيرة على النت، أنا تعبت نفسيًا الدكاترة شغالين يحولوني لبعض، لسه مركبة جهاز هولتر في القلب في مستشفى الدمرداش من كتر التعب، أنا كل اللي طالباه يبعد عني أنا وأهلي،، أنا مش عايزة أرجع له وكل ده عشان ما رضيتش أرجع له".

اقرأ أيضًا:

"لو مرجعتيش هدبحك".. شقيقة سيدة تستغيث بعد محاولة زوجها قتلها (خاص)