"أنا جوزي ظابط".. ضبط المتهمة بالتعدي على سائق نقل ذكي بمدينة نصر

ألقى رجال المباحث بقسم أول مدينة نصر القبض على المتهمة بالتعدي بالسب على سائق نقل ذكي وتصويره ونشر مقطع الفيديو عبر منصات التواصل الاجتماعي.

خلاف بسبب عدد الركاب

وروى السائق تفاصيل الواقعة في تصريحات خاصة لـ"تليجراف مصر" كاشفًا ما حدث منذ لحظة وصوله إلى مكان العميلة.

7 ركاب في رحلة واحدة

وقال السائق: “الرحلة دي كان المشوار داخلي جوه مدينة نصر، وصلت عند العميلة، كان في 7 ركاب منهم 4 أطفال”.

السائق ينتظر والدة الأطفال للتأكد

وأضاف: "سألتها حضرتك أنتوا كام واحد؟ قالت لي إحنا سبعة، لها لا والله أنا متأسف جدًا مش هقدر أركب 7 في عربيتي، وسياسة الأبلكيشن بتقول إني أركب 4 أفراد بس، مش هركب 7 أفراد".

محاولة لتسيير الأمور بسبب الأطفال

وأشار السائق إلى أن السيدة بررت قائلة: "إحنا جايين بنفس الطريقة دي"، فسألها: "أنتوا 7 أفراد بالأطفال دي ولا في أفراد تانية معاكم؟ قالت لا إحنا 7 أفراد، إحنا 3 والـ 4 أطفال دول".

وتابع: "قلت لها خلاص مفيش مشكلة، قلت أطفال مش هياخدوا مساحة في العربية، وعشان خاطر ما أعملش مشكلة ولا شوشرة.. مشيت الدنيا".

“إيه القرف ده”.. نقطة التحول

وروى السائق تفاصيل اللحظة التي انفجر فيها الموقف قائلًا: "بدأوا يركبوا، فلقيت اللي هي في الفيديو دي وهي بتفتح الباب بتقول: إيه القرف ده؟ فقمت نازل من الباب، قلت لها طب انتي ليه بتغلطي؟ أنا غلطت فيكي؟ انتي بتستنكري كده ليه؟ قلت لها اتحكمي براحتك، انتي جاية تركبي عربيتي فكأنك في بيتي، كأنك ضيف عندي، المفروض تحترميني.. ما تقوليش إيه القرف ده".

سباب وادعاء بأنها زوجة ضابط

وتابع: "فبدأت تشتم بقى، أنا قمت مطلع الموبايل، لقيتها هي طلعت الموبايل الأول وفضلت تشتم وتقول هحبسك، فأنا قمت مطلع الموبايل.. عايز أصورها عشان لما يتعمل محضر".

واختتم السائق حديثه قائلًا: "ركبوا تاكسي ومشيوا. معنى إنها تركب تاكسي وتمشي.. لو شايفة إنها صح ومش غلطانة كانت فضلت واقفة وطلبت رحلة تانية، لكن هي ما حبتش تضيع وقت، وأنا لحد دلوقتي مش عارف أعمل أي إجراء، وبعت لهم الفيديو".

اقرأ أيضًا:

ضبط عامل وصاحب محل بعد مشاجرة بسبب خلافات الجيرة في المنوفية