إيناس الدغيدي: رفضت الزواج من صديقي المثلي جنسيًا

كشفت المخرجة إيناس الدغيدي، رفض زواجها من رجل مثلي جنسيًا، وذلك خلال استضافتها ببرنامج "أسرار" مع الإعلامية أميرة بدر المذاع على قناة النهار.

وقالت إيناس الدغيدي: عُرض عليّ الزواج من صديقي المثلي جنسيًا ورفضته، هو كان صديق برا عايش في إيطاليا، وكان سنه كبير، وعارف إني عارفة ميوله، وكان عايزنى عشان أبقى رفيقة.

أوضحت: طلبني للجواز لإن سننا مش بتاع شهوة، وضحكت لما عرض عليا، ويمكن يطبطب عليا وجنبه حد تاني من جنسه، ومكانش يعرف رد فعلي وحولت الموضوع هزار، كان رجل عربي، وصديقي ورجل محترم وبيعمل خير.  

قراءة الفنجان

وتابعت المخرجة إيناس الدغيدي،: "عمري ماحسدت حد، وبحب أشوف الفنجان، وكل  شهور واحدة بتجيلي تقرالي الفنجان، لإني مقتنعة إن اللي بشوفه بحققه، وآخر مرة من أسبوع واحدة قالتلي هيجيلك موبايل هدية، قلت إيه الهبل دا، بعدها جالي تليفون هدية فعلًا، استغربت جدًا، وفي حاجات كتيرة بتتحقق.

وعن رأيها في خبيرة الفلك ليلى عبد اللطيف، قالت إيناس الدغيدي: هي صديقتي لكن شافت لي مرة الفنجان ومتحققش.

أحلام إيناس الدغيدي 

وتحدثت إيناس عن أحلامها، قائلة: عندي شراهة للسفر، لما برجع من رحلة بفكر في اللي بعدها، وأنا حاليا في آخر حياتي عايزة ألف العالم، يارب ابعتلى مليون دولار عشان ألف العالم، ونفسي أشتغل مع إلهام شاهين مسرح لإنها خريجة مسرح ولغتها كويسة.