جبتلها كفن بدل فستان الزفاف.. حماة ضحية شبرا الخيمة: ياما نصحتها تبعد عن صاحبتها

المجني عليها

A . .A

بكلمات تعتصر ألمًا وحسرة، روت حماة "نورة" الفتاة التي توفيت على يد خطيب صديقتها بشبرا الخيمة، تفاصيل مأساوية مطالبةً بالقصاص ممن تسبب في إنهاء حياة عروس ابنها قبل زفافها بشهر واحد.

صداقة تنتهي برصاصة

وقالت والدة هاني خطيب نورة لـ"تليجراف مصر" باكية: “نورة مخطوبة لابني، وذكرى صاحبتها كانت خطيبة ابني القديمة وسابوا بعض”.

وتابعت: "نورة وذكرى صحاب من زمان، أنا ياما نصحتها تبعد عنها بس هي ماكنتش بتسمع الكلام وتقول دي صاحبتي وأكلنا عيش وملح مع بعض".

وتضيف: “هما كانوا في المستشفى جم من المستشفى وذكرى رايحة عند خطيبها (القاتل) تقريبا وحصل مشاجرة بينها وبين خطيبها ونورة بتسلك بينهم راح ضربها في دماغها.”

واستطردت الأم بالقول "منها لله صاحبتها حسبي الله ونعم الوكيل فيها هي اللي قالتلها تعالي نبص على خطيبي".

مكالمة صادمة من المدرسة

تروي السيدة تفاصيل اللحظات الأولى لسماع الخبر: "أنا كنت في شغلي وجالي تليفون من بنتي وهي في المدرسة بتقولي إلحقي يا ماما نورة خطيبة هاني اتضربت بالنار، نزلت جري زي المجنونة من الخصوص لشبرا الخيمة".

وتابعت بصدمة: "لفوها في حصيرة ورموها، وفيه أخبار إنه تم القبض على المتهم.. إنما خالتها اللي مربياها في حالة صعبة جدا وبتموت عليها هنا".

"شهر 11 كان فرحها".. الأم المكلومة تطالب بالقصاص

وبصوت مخنوق تطالب الأم بحق العروس: "إحنا بنطالب بحقها هم جروها وكأن في نيتهم إنهم يقتلوها، يمكن ذكرى دي لسه بتحب ابني فعملت كده معرفش بس نورة دي بنتي أنا مش هتنازل عن حقها مهما يحصل".

الكفن بدل فستان الفرح

وفي مشهد يدمي القلوب كشفت حماة نورة عن تفاصيل مؤلمة بالقول: "خالتها جابتلها فستان سهرة عشان تحضر بيه فرح ابن خالتها.. والنهاردة جبت لها الكفن بدل الفستان.. دي عروسة كان فاضلها شهر .. كان قدامها شهر بس وهتبقى في بيت ابني".

صدمة الخطيب

وعن حالة ابنها خطيب المجني عليها قالت: "ابني من الصدمة ضرب دماغه في الحيطة لحد ما وصل مستشفى زينهم مكنش يعرف إنها ماتت.. أمها وأبوها منفصلين وأمها في النيابة دلوقتي".

وأكدت أن نوره كانت طيبة القلب: "نورة دي أطيب خلق الله.. مكنش فيه بينها وبين خطيب صاحبتها ذكرى إلا إزيك أخبارك إيه وكانت بتسلك بينهم في مشاكلهم".

رموها في الزبالة

واختتمت حماة نورة حديثها بغضب: "هو المتهم بيتخانق مع خطيبته وهي بتسلك بينهم ضربها بفرد الخرطوش.. وهي لو فعلا كانت صاحبتها وبتحبها توديها المستشفى مترمهاش قدام حظيرة في الزبالة على جنب.. إحنا مش طالبين أكتر من الإعدام".