"مش عارفة هي عايشة ولا لأ".. أم تتهم طليقها بتهديدها وحرمانها من طفلتها

استغاثت سيدة تُدعى سناء البحيري من طليقها، متهمة إياه باختطاف ابنتها، وذلك من خلال مقطع فيديو نشرته عبر موقع التواصل الاجتماعي "فيسبوك".

وقالت البحيري لـ"تليجراف مصر": :أنا بستغيث بالمسؤولين علشان أشوف بنتي، أنا كنت متجوزة ومنفصلة من سنتين، وطليقي جزار وصاحب سلسلة مطاعم شهيرة في طنطا، عندي منه بنت اسمها كندا، عندها حاليا 3 سنوات، وهو خاطفها من شهر رمضان اللي فات، ومش عارفة عنها حاجة".

قرار حضانة للأم ومحاولات ودية للتنفيذ

وتابعت: "بقالي 9 أشهر مشوفتش بنتي ولا أعرف حاجة عنها، ونفسي أسمع صوتها ومش عارفة أوصلها، وحاولت معاه بكل الطرق الودية، وهو مش راضي برضه".

وأضافت والدة الطفلة: "معايا قرار من المحامي العام بتسليم الصغيرة، وإنها في حضانتي، وكل ما أروح أشوفها بالقرار، مبيكونش في البيت، وبيقولي: إنتي جاية ليه؟ أنا عارف إنك جاية ومش هتشوفي البنت".

واستكملت حديثها: "بيقولي لو مبطلتيش تسألي عن البنت وتعملي شوشرة، هقتلك وهقتل بنتك وأحسرك عليها، وأنا مش لاقية ليه حل ولا عارفة أتصرف إزاي".

وأضافت: «واخدة عليه أحكام قضائية بعدم تسليمي بنتي، ومش عارفة أنفذ الأحكام علشان مش بيكون موجود، وبقالي 9 شهور مشوفتش بنتي، ومش عارفة هي عايشة ولا لأ، ومش عارفة أسمع صوتها».

واستكملت: "أنا عايشة في رعب وتهديدات، وبطالب المسؤولين يساعدوني علشان أشوف بنتي أو أسمع صوتها. أنا عاوزة أطمن على بنتي ومحتاجة حد يساعدني".

وتفاعل رواد مواقع التواصل الاجتماعي مع استغاثة الأم، مطالبين بعودة ابنتها إليها والاستجابة لمناشدتها.

وأعاد مستخدمو مواقع التواصل الاجتماعي نشر مقطع الفيديو، في محاولة لمساعدة السيدة على رؤية طفلتها والاطمئنان عليها.

اقرأ أيضا:

اختفيا من الوراق وظهرا في الإسكندرية.. أم تروي رحلة البحث عن طفليها لمدة 18 يوما