أسرة ضحية السلام تكشف كواليس مقتل خالد على يد زوج شقيقته

روت أسرة خالد جمال، ضحية منطقة السلام، تفاصيل مقتله على يد زوج شقيقته، مؤكدين أن المتهم خطط للجريمة واستعان بشقيقه لإبعاد الأهالي عن مسرح الجريمة.

والتقت "تليجراف مصر" والد الضحية وشقيقه وابنته وشاهد عيان على الواقعة، الذين أجمعوا على مطالبة واحدة: "عايزين القصاص.. عايزين حق خالد بالقانون".

البداية.. زيارة للاطمئنان على الشقيقة انتهت بضربة شاكوش

فال والد خالد، بصوت مكسور: "الواقعة كانت يوم الاتنين الساعة واحدة بالليل، أنا وخالد روحنا نطمن على بنتي، حصلت مشادة بين خالد وجوز أخته، خالد دخل قال سلام عليكم، رد عليه جوز أخته: انت داخل تقول سلام عليكم؟ هما ما بيطيقوش بعض أصلاً".

وأضاف الأب: "شدوا مع بعض، مسك شاكوش وجاي يحدف بيه خالد، جه في دماغي أنا، استحملت وسلكناهم ومشينا خالد عشان ما يحصلش مشاكل، قلت لمحمد حقك عليا يا ابني وهديت الدنيا ومشيت أجيب عشا لعيالي، وأنا راجع لقيت بنتي أمل بتصرخ: الحق أخويا مات.. وإيديها وهدومها كلها دم".

الأب: بنتي ما صعبش عليها أخوها

وعن موقف ابنته زوجة المتهم، قال الأب بأسى: "بنتي بتقول طب أنا معايا سبع عيال مين هيأكلهم؟ هي ما صعبش عليها أخوها، جوزها وعيالها رقم واحد عندها، أنا بطالب بالإعدام.. عاوز حق ابني".

وأكد الأب أن شقيق المتهم، ويدعى مصطفى، كان شريكاً في الجريمة.

شقيق الضحية: الخطة كانت مرسومة

وروى طارق جمال، شقيق المجني عليه، تفاصيل الخطة التي وضعها المتهم، قائلاً لـ"تليجراف مصر": "اللي حصل مش خناقة عادية، محمد غزال ده ساكن في المفارق، مش ساكن معانا في النهضة، جاي مخصوص وراكب عربية ومعاه سلاحه المطواة والكازلك، ده بيمشي بيهم على طول ومعروف عنه كده في المنطقة".

وتابع: "أنا روحت بست على دماغ محمد وقلتله حقك عليا إحنا أهل، مشيناه، وبعدها بساعتين قالولي محمد غز أخوك، إزاي؟ مصطفى أخوه جه المربع عندنا وقال للناس: الحقوا محمد وخالد بيدبوا في بعض برة.. هو كان عايز يفضي المكان ويسحب أهل الحتة برة، عشان أخوه ييجي من ورا البلوك ويغزه".

وأضاف: "ركب له المطواة في جسمه انتقام، إحنا عندنا 3 عيال وخالد كان سايب 4، والسبعة في رقبتي، أنا مش عاوز آخد حقي بدراعي وأضيع نفسي، عاوز حقه ييجي بالقانون".

 استفزاز من زوجة المتهم

واتهم شقيق الضحية، زوجة المتهم "شقيقتهم" باستفزازهم: "بتبعت فويسات بتقول أنا مقومة محامي بـ50 ألف وهيطلع يعني هيطلع، ومعانا فيديو بالكلام ده، هي مريضة بتجري وراه وتقوم له محامين وناسية إن ده قاتل أخوها".

ابنة الضحية: عايزة حق أبويا

وبصوت باكٍ، قالت رودينا، ابنة المجني عليه خالد: "أنا عايزة حق أبويا، اتقتل في الشارع ولازم حقه ييجي بالقانون، عمتي بعتت فويس بتقول هيطلع وأنا دافعة 50 ألف، لأ.. حق أبويا لازم ييجي".

وروت رودينا ما سمعته من والدها قبل مقتله: "أبويا كان رايح لعمتي عشان يقولها ما ينفعش تباتي عند واحد غريب، فجوز عمتي قال له إنت داخل ما بتسلمش وطرده، قبليها كان ضارب جدي بالشاكوش".

شاهد العيان: لف المطواة في قلبه

وكشف شاهد العيان وابن عمة الضحية، تفاصيل اللحظات الأخيرة: "مصطفى أخو محمد جه قالنا خالد ومحمد بيدبوا في بعض برة، الشارع كله جري، وأنا واقف لقيت محمد جاي من الشارع التاني، خالد داخل وحاطط إيده في جيبه ومش مدي خوانة، راح محمد داخل عليه وقاله انت بتشتم إخواتي؟ قاله آه.. راح مركب له المطواة في قلبه ولفها، خالد وقع في ساعتها ما لحقش يعمل حاجة".

وأضاف: "أنا مسكت عكاز وضربته من الصدمة، جري ورايا ووقعني وكان عايز ينزل عليا بالكازلك ورجلي كانت مكسورة".

واختتمت الأسرة حديثها لـ"تليجراف مصر" بمطلب واحد: "عايزين حق خالد بالقانون، إعدام مع سبق الإصرار والترصد، ومش عايزين مشاكل، عشان حق عياله الـ4 اللي أبوهم كان هو اللي بيصرف عليهم".

اقرأ أيضًا:

بالاتفاق مع زوجها.. سيدة تنهي حياة عشيقها بعد تهديده بنشر فيديوهات خاصة لها بالمرج