تامر أمين: "بعتذر لو قولت شيرين صوت مصر"

اعتذر الإعلامي تامر أمين عن منح المطربة الفنانة شيرين عبد الوهاب لقب "صوت مصر"، مؤكدًا أنه “من المستحيل اختزال صوت مصر كلها تحت اسم واحد”. 

وقال أمين، خلال استضافته مع الإعلامية بسمة وهبة ببرنامج "العرافة"، والذي يعرض عقب أذان المغرب مباشرة عبر قناة "المحور"،  "إيه المعنى من خناقة على لقب صوت مصر، عمرنا ما سمعنا إن السيدة العظيمة أم كلثوم بذات نفسها والتي لا تنافس ولا تقارن بحد، بتقول على نفسها صوت مصر؟، واللي عارف قيمته مبيتاجرش بالألقاب، واللي عارف إنه فنان حقيقي وعارف حب الناس ليه، وعارف إنه يقدر يقدم منتج فني الناس هترضى عنه، آخر همه الألقاب، أما الذين يسرقون الألقاب فهم بحاجه إلى مراجعة نفسهم".

وأضاف "شيرين وآمال ماهر هما اللي بيجروا وراء الألقاب، وأنا مبحبش دا، وطبعا بكل شجاعة بقولها، ومفيش حد صوت مصر، ومصر أكبر من أن يكون شخص صوتها، مصر مش يمكن تختزل في شخص".

وتابع "لما قلت شيرين صوت مصر خلينا نمشيها كان إحساس حلو وصوت حلو، وبعتذر لو قولت شيرين عبد الوهاب صوت مصر كدا مطلقا، فأنا بسحب كلامي وبتراجع عنه، وبعتذر، لأن صوت مصر حاجه كبيرة أوي، ويعني إزاي نقول على شيرين صوت مصر ومش نقول على عبد الحليم وأم كلثوم كدا، وإحنا مش ولاد الجيل دا إحنا ولاد الجيل اللي فات".