شوبير: "خلي الجماهير تطبّل براحتها ..وتفرح بفرقتها"

تناول أحمد شوبير حارس مرمي منتخب مصر وفريق الأهلي السابق، عبر إذاعة “أون سبورت إف إم”، غياب الكثير من جماهير القلعة الحمراء في المباريات الأخيرة لفريق كرة القدم بالنادي، بسبب المضايقات التي يتعرض لها الجماهير، ومنع أدوات التشجيع، والأعلام، ومنعهم من ارتداء تي شيرت الشهداء المرقم بـ72 تخليدًا لذكرى شهداء الأهلي.
وقال شوبير صباح اليوم، “إنت النهاردا بتقول ليه 20 ألف متفرج لمباراة الأهلي والزمالك والأستاد هيفتح الساعة 3 والماتش أساسًا الساعة 7.. ليه كل دا؟ دا همّا 10 آلاف مشجع هنا و10 هنا، أنا من حقي أروح قبل الماتش بـ5 دقائق ألاقي مكاني موجود”.
وتابع "لازم موضوع الاكل والشرب في الاستاد يكون بسعر مناسب والتذكر كمان يكون سعرها مناسب وبالأخص في المباريات العادية وارفعها شوية في ماتشات الاهلي والزمالك مافيش مشكلة".

وأكد شوبير ضرورة دخول المشجعين الي الملعب بأدوات التشجيع وقال “أنا مشجع أدخل إزاي من غير علم ومن غير الطبلة الكبيرة اللي بتبقي مع أكتر من مشجع، وإيه المشكلة أروح أغني وأتبسط وأزمّر.. الجمهور مش على هوا حد، الجمهور على هوا اللي بيحبه وزمان الجمهور كان بيخترع لنا أغاني وإحنا في الملعب”.

وتابع شوبير “ليه المشجع ما يلبسش الرقم 72 إزاي يعني دا لاعبي الأهلي بيتدربوا وبيسخنوا بالرقم دا، كدا كدا ممنوع تماما الخلط بين السياسة والرياضة أو بين السياسة والمدرج، عشان نقدر نتمتع ونفرح، لكن في نفس الوقت مش شايف أي مشكلة في لبس التي شيرت، والممنوعات اللي ممنوعة أنت ملتزم بيها أكيد”.
وأكد شوبير قوة الدولة المصرية التنظيمية وقوة القانون الذي يطبق على الجميع، وقال “أنت في دولة محترمة فيها نظام لازم يطبق علي الجميع، بس في نفس الوقت ريحني وأنا بشجع، وفي نفس الوقت أنت كمشجع بلاش تطاول في ولا ألفاظ في المدرج، زمان كانوا بيقولوا مانجا مانجا مانجا رجل الخطيب كمنجة، سبني أفرح مع فرقتي وألبس فانلتي، وأرفع علمي وأضرب على طلبتي طالما أنا ملتزم”.