"منقدرش نبعتلك بياناته"..فتاة جديدة تتهم "أوبر" بالسرقة (صور)

اتهمت فتاة تدعى سارة أسامة سائق أوبر بسرقة مشغولات خاصة بعملها "إكسسوارات"، موضحة أنها طلبت أوبر  حتى يقوم بتوصيل بعض الأشياء من منزلها بمنطقة الشيخ زايد إلى مكان آخر.

شركة أوبر

وزعمت سارة خلال منشور لها عبر صفحتها الشخصية بموقع فيسبوك: "السواق في الأول رفض عشان هدفع فيزا وبعدها قالي تمام خلاص هوصلها، بعد ما مشي بربع ساعة اتصل بيا يقولي هو الحاجة دي عبارة عن إيه علشان لو وقفت في كمين؟ قولتله إكسسوارات، قال لي تمام".

وتابعت سارة خلال المنشور الذي لاقى رواجًا واسعًا: “رجع بعدها ب 10 دقايق اتصل وقالي أنا هتأخر شوية علشان هقف أشحن الموبايل وهحط بنزين”. 

أضافت: قولت له مش هينفع تتأخر علشان المكان بيقفل الساعة 8، قال لي أنا مش سامعك كويس هقف وأكلمك تاني".

وتابعت: "رجع اتصل بعدها بربع ساعة وقال الماكينة عطلت وأنا في مكان في النزهة عند الكيلو 4 ابعتي لي حد ياخدها مني، قولتله أبعتلك ازاي يعني اتصرف ورجعها لي يا إما توصلها للمكان أنا مش هعرف انزل اجيلك وأنا معرفش انت فين أصلًا..قال طيب هشوف واكلمك".

واستكملت سارة: "بعدها نهى الرحلة في مكان في النزهة.. جوزي راح للمكان اللي قال عليه بعدها بـ 10 دقايق زي ما قالنا ملقاش حد ونزل يدور في ورش الموتوسيكلات اللي حوالين المنطقة دي لإنه ممكن يكون بيصلحها فيها ملقاش حد برضه".

واختتمت سارة حديثها: "ببعتلهم في support من امبارح مش راضيين يبعتولي رقمه ولا يوصلوني بيه!..كل اللي بيردوا بيه إننا منقدرش نبعتلك بياناته الشخصية واحنا بعتناله رقمك وهيكلمك..والنصاب ده سرق شغلي بكل سهولة ومش عارفة أوصله ولا آخد حقي منه ولا من المنظومة اللي كلها فساد وسرقة وقتل دي".

ضحايا أوبر

تلك الحادثة ليست الأولى لشركة النقل الذكي أوبر، حيث اتهمت الفنانة هلا السعيد سائق أوبر بالتحرش بها على طريق محور الضبعة في 22 مايو الجاري، وقالت خلال مقطع فيديو نشرته عبر صفحتها على انستجرام: "الحيوان حيوان أوبر فجأة وقف في الطريق، وقالي العربية سخنت، لقيته فجأة بيفك البنطلون، وجريت ودلوقتي أنا واقفة في الشارع".

وفي 13 مايو الجاري أيضًا، شهدت منطقة التجمع الخامس  بالقاهرة واقعة تعدٍ على معلمة لغة إنجليزية من قبل سائق "أوبر".

وبحسب شقيقة الضحية عندما طلبت أختها "أوبر" لرغبتها في حضور حفل زفاف بمدينة الشيخ زايد، لاحظت سلوكًا غير طبيعي على السائق وحاولت الاتصال بها أكثر من مرة.

وأضافت في تصريحات تلفزيونية مع الإعلامي عمرو أديب ببرنامج الحكاية، أنها تلقت اتصالًا هاتفيًا من شخص مجهول يستخدم هاتف أختها، يخبرها بالعثور على الأخيرة في منطقة صحراوية وقد تعرضت للضرب وجروح غائرة في أنحاء متفرقة من جسدها عقب محاولة السائق التحرش بها.