منال عبد اللطيف: "بفكر أقلع الحجاب.. مش عاوزة حاجة تقيدني"

كشفت الفنانة منال عبد اللطيف، ترددها المستمر بشأن ارتداء الحجاب، وتفكيرها  بعض الأحيان في “خلعه”.

وقالت عبد اللطيف، خلال لقائها في برنامج " قعدة ستات"، “أنا ليه بفكر إني أقلع الحجاب، ليه الفكرة بتراودني لأن أوقات بتوحشني منال اللي هتبقى المنطلقة، وأنا بطبيعتي منطلقة، وطلعنا فاصل مرتين علشان أظبط الحجاب”.

 واستكملت" أوقات بتوحشني منال، وببقى عايزة انطلق في كل حاجة وإن مفيش حاجة تقيدني لكن سريعًا بقول لأ أنتي تدعي ربنا إنه يثبتك لإن دي خطوة مش هينة على طول برجع لدماغي فورًا، لكن بتراودني الفكرة طبعًا بتراودني ".

منال عبد اللطيف وخلع الحجاب

وتابعت" كتير بفكر أقلع الحجاب، وكل ما بتيجي الفكرة على بالي، واقول يا منال اقلعي بقى الحجاب، وبعدين أقول لنفسي انتي اخدتي الخطوة وقعدتي السنين دي، والفكرة اللي بتلح عليا إن إن شاء الله لما بنتي الكبيرة فرح تتجوز بفكر إني في الفرح أقلع الحجاب مش عارفة ليه بس الفكرة دي بتزن عليا، ومش ضروري ألبس فستان مفتوح أهم حاجة إني أكون منطلقة، لإن دايمًا الطرحة بتضايقني وأقعد طول الوقت أظبطها، وبقالي  أكتر من 11 سنة محجبة، ودا وقت كبير جدًا". 

رد فعل الجمهور

وعن ردود فعل الجمهور حال خلعها للحجاب، قالت" أنا بحترم رأي الناس، لكن في مناطق شخصية بتاعتي مش بتاعتكم محبش حد يتدخل فيها، ورأي الناس يحترم لكن أنا اللي على قناعتي هعمله، وطالما مابيضرش حد يبقى محدش له دعوة بيا، والسوشيال ميديا مبخافش منها، وأنا مابيشغلنيش غير دائرتي الأولى وهم جوزي ووالدي وبناتي وصديقاتي المقربات، غير كده اللي برا دايرتي براحته".