حسام حبيب: "مش عارف عملت إيه لـشيرين ضايقها مني" (خاص)

أكد الفنان حسام حبيب، أنه لا يريد الإساءة إلى طليقته الفنانة شيرين عبدالوهاب، وأنه لا يريد تشويه صورتها أمام الرأي العام.

وخص حبيب ”تليجراف مصر"، بتسجيل صوتي رد من خلاله على اتهامه بتدمير حياة شيرين عبدالوهاب، قال فيه: "أكيد أنا عمري مهقلبها حرب ضد شيرين وعمري مكنت عايز أطلعها وحشة".

وتابع: “على عيني أعمل كده، أنا اتحطيت في الموقف إني لازم أدافع عن نفسي، ومدام هدافع عن نفسي، أكيد هغلطها، بس هو ده التسرع وهو ده الأفعال الغير محسوبة ومش مفهومة”.

نفسي أقف جنبها

وأضاف حسام حبيب: “أنا أعوذ بالله إني أطلع أي حاجة عن شيرين وحشة، أنا فعلا نفسي أقف جنبها وأشوفها سعيدة تاني وأشوفها خارجة ومبسوطة وشايفة عيلتها وشايفة بناتها وشايفة حياتهم وشايفة شغلها ومكسرة الدنيا وجمهورها ومتتكلمش خالص عن المشاكل وتبعد عن الجو الكئيب اللي كنا فيه الفترة اللي فاتت دي وأشوفها أحسن واحدة في الدنيا”.

وأردف: “الموضوع ده أنا مش عارف أصلا مش قادر أتكلم فيه لأني مش فاهمه لحد دلوقتي مش فاهمة إيه اللي حصل لسه بجمعه عايش في إنكار غصب عني مش بمزاجي، لحد دلوقتي مش فاهمة اللي حصل”.

مش عارف شيرين عملت كده ليه

واستكمل الفنان حسام حبيب حديثه، قائلا: "مش عارف شيرين عملت كده فعلا قاصدة ولا حد قالها تعمل كده وعملت كده ليه أصلا، ده برضو حاجة مش مفهومة بالنسبالي، إيه اللي أنا عملته يضايقها لدرجة إنها ممكن تعمل حاجة زي كده".

وأشار: “كل أسئلة دي بتدور جوايا بس للأسف مش لاقي أي سبب، أي سبب يخلي حد يعمل ربع اللي هي عملته أو خمس اللي هي عملته، ده بس عايزك بس تبقى فاهم، لا يمكن، مستحيل، مستحيل، أبني سعادتي أو أبني نجاحي على شيرين، مستحيل، ده حاجة مش هتحصل”.