مفجّر أزمة "فلاشة الكيمياء": الامتحان اتعرض عليا ورفضت

كشف مدرس الكيمياء، محمد عارف، الذي فجّر أزمة بيع امتحان الكيمياء 2024 قبل أشهر من امتحانات الثانوية العامة، تفاصيل الواقعة لـ"تليجراف مصر"، مؤكدا أن “فلاشة الأسئلة” تم عرضها عليه في شهر رمضان الماضي ولكنه رفض.

بيع فلاشة لامتحان الكيمياء

وقال “عارف”، إن هناك شخصا تواصل معه يزعم أنه يعمل في وزارة التربية والتعليم، في شهر مارس الماضي، وقال له إنه يدعى “ي.أ.” ويعمل بمركز تطوير المناهج بوزارة التربية والتعليم، وعرض عليه “فلاشة” تحتوي على 200 سؤال لأسئلة امتحان الكيمياء 2024، بمقابل مادي كبير، في مقابل يروّج لنفسه على مواقع التواصل الاجتماعي بأن مراجعته النهائية تحتوي على أسئلة الامتحان.

وأكد لـ"تليجراف مصر"، أنه سأله وقتها “لماذا أنا”، فقال له لأنك مجتهد ولك طلاب كتير، موضحا: "قال لي إن اللي هيحصل نفس اللي حصل في امتحان الفيزياء السنة اللي فاتت، ولكن أكد عليّ أن أغيّر أرقام الأسئلة في مراجعتي، حتى لا أقع في نفس مشكلة مسرّب امتحان الفيزياء 2023.

وأضاف أن هذا الشخص كان يرسل له جميع كتب الوزارة بعد طباعتها فورا، قائلا: “لما سألته ليه كده واشمعنا الكيمياء، قاله علشان الكيمياء كانت صعبة السنة اللي فاتت، وعايزين نفرّح الطلاب، خلي الشعب يفرح وأنا أستفيد وأنت تستفيد، والفلوس هتروح لمصر وتطوير التعليم".

وتابع "أنا اتخضيت، قالي إحنا بندي الامتحان لأكتر من حد، لكن اللي اتمسك في الكيمياء كان غبي، ونزّل الأسئلة بنفس الأرقام، قالي فكّر وهكلمك تاني، هندي لأكتر من مدرس في أكتر من محافظة، مكنتش عارف أعمل إيه وخايف، لكن في حد قالي هات آخره، فكّرت الحقيقة أخدها منه وأحطها في مراجعاتي، وقولت لو جت هكسب ثقة الطلاب مجتش مش خسران حاجة، وقلت كده هتشهر لكن فكرت إن لو اتشهرت كده الفلوس هتبقى مبنية على حرام".

وتابع عارف "كنت بين نارين، نار الفضول، وإنه حرام، قعدت فترة بفكر وهو بيزن عليا بطريقة مريبة، وكل لما الوزارة كانت تنزّل كتاب يبعتهولي، واتفقنا نتقابل لكن اتأخر عليا مشيت روحت حصة جه ليا رفضت أقابله وقفلت الباب، وبعد الامتحان لقيت مدرسين فعلا منزلين إسكرينات ونفس الدعايا اللي كان طلبها مني، وإن الامتحان من توقعاتهم، وأنا مستعد أساعد وأقول كل اللي معايا، ومعايا رقم الراجل واسمه واسكرينات بكلامه".

وأكد “عارف”، أنه قال له أن نظام التعليم سيتغير والفيزياء والكيمياء والأحياء ستكون مادة واحدة فقط، لافتا: “وراني كارنيه ليه بإنه شغال في الوزراة، وجاهز لأي حاجة ومعايا ما يثبت ذلك”.

بيع امتحان الكيمياء

وأثار بث مباشر على "فيسبوك" لمدرس الكيمياء محمد عارف، ضجة كبيرة على منصات التواصل الاجتماعي، بعد تأكيده أن "امتحان الكيمياء تم بيعه لبعض المدرسين قبل شهور".

تحقيق لكشف تفاصيل الواقعة 

وأكد مصدر مسؤول بوزارة التربية و التعليم والتعليم الفني، أن الوزارة تجري فحصا شاملا حول ما أثاره بعض مدرسي مادة الكيمياء للثانوية العامة، بخصوص تشابه عدد من الأسئلة في المراجعات النهائية مع أجزاء من الامتحان هذا العام.

وقال المصدر لـ"تليجراف مصر"، إن التحقيقات الموسعة تدرس كل ما أثير على منصات التواصل الاجتماعي، سواء من معلمين أو أولياء أمور، للوقوف على الحقيقة، مع دراسة كل سؤال على حدة وعلاقته بأسئلة الامتحان.

وأضاف أن اللجنة المتخصصة تضمن كوادر من المركز القومي للامتحانات، والهيئة الاستشارية للمادة، وتقوم بالتدقيق الصارم في كل ما أثير للوصول إلى الحقيقة الدقيقة والمفصلة حول امتحان الكيمياء، مشددًا على أن "أي مخالفة لن يتم التستر عليها".