إمام عاشور يعتذر لصديق مروان عطية: "أوعى تكون لسه زعلان"

اعتذر إمام عاشور، لاعب النادي الأهلي، للشاب محمد أشرف، صديق اللاعب مروان عطية، على خلفية اعتدائه عليه في حفل زفاف الأخير.

ونشر "محمد أشرف" عبر صفحته الشخصية بموقع فيس بوك، صورة تجمعه مع اللاعب إمام عاشور من مكالمة فيديو كول، معلقا عليها: “بسم الله وإن تعفوا وتصفحوا وتغفروا فإن الله غفور رحيم، بالنسبة للموضوع اللي كان حاصل بيني وبين الكابتن إمام عاشور، فـ الموضوع كان خلصان في وقتها والكابتن إمام برا القاعة رضاني بعد ما عرف إن القصة كانت سوء فهم مش أكتر والموضوع خلص”.

وأضاف “الفيديو لما نزل على السوشيال في ناس خادته في سكة أهلي وزمالك لكن الناس مشافتش اللي حصل بيني وبين الكابتن إمام برا القاعة الناس شافت الفيديو اللي فيه المشكله بس، والكابتن إمام اتصل بيا وكلمني كذا مرة النهاردة وكلمني فيديو وقالي أوعى تكون لسه زعلان على السوء تفاهم والراجل اتكلم بكل احترام وأنا شكرته على أسلوبه وإنه رضاني والموضوع انتهى”.

واختتم المنشور قائلا: “فياريت الناس الكويسة اللي يهمها الحق وملهاش علاقة بأهلي وزمالك، حصل سوء فهم واتزقيت ولما الصورة وضحت الراجل تفهم الموضوع سواء وقتها أو بعد كده وأنا الحمد لله مرضي والحمد لله إن الموضوع خلص وعدا وفات، اللي يهمه شخصي فـ أنا اتراضيت والموضوع خلص واللي واخد المسألة شخصية وأهلي وزمالك ف ده ربنا يهديه لنفسه ولحاله، وفي النهاية وبعيدا عن الكورة كلنا حبايب وكل التقدير والاحترام لكل الناس المحترمة اللي اتدخلت ف الموضوع”.

كان مستخدمو مواقع التواصل الاجتماعي تداولوا مقطع فيديو من حفل زفاف مروان عطية، لاعب النادي الأهلي، ظهر فيه اللاعب إمام عاشور وهو يتعدى على أحد الحضور ظنا منه أن يصور زوجته ويقف خلفها خلال حفل الزفاف.

كما ظهر خلال الفيديو رجال تأمين حفل الزفاف أثناء إبعاد الشاب وإمام عاشور، واستكمال الاحتفال مع العروسين.