سامي عبد الراضي: شيرين عبد الوهاب قالت لي "انقذوني من حسام حبيب"

كشف الكاتب الصحفي سامي عبد الراضي، رئيس تحرير "تليجراف مصر"، تفاصيل جديدة عن علاقة الفنانة شيرين عبد الوهاب بطليقها حسام حبيب.

وقال عبد الراضي، خلال مداخلة تلفزيونية مع برنامج "آخر النهار" الذي يقدمه الإعلامي تامر أمين ويذاع علي فضائية "النهار"، "أنا عملت حوار تليفوني مع شيرين لمدة ساعة وأول حاجة قالتها انقذوني من حسام حبيب، والكلام كان موجه لجمهورها وللإعلام، وأي حد يقدر يمد إيده ليها وينتشلها من اللي هي فيه".

وأضاف "شيرين مضغوطة جدا وبتمر بظروف قاسية جدا ومن كتر الضغوط بيجيلها نوبات اكتئاب علي فترات، وهي قالت إن حسام خد منها 200 ألف دولار إمبارح وبيستغل إن بنتها قاصر وبيستعطف البنت وبيقولها أنا مكتئب وحالتي النفسية سيئة وعايزك تنصحيني وتساعديني لدرجة أنه مسيطر على البنت ومكره بنتي فيا وفي أهلي".

وعن تنازلها عن محضر الضرب الأخير، قال عبد الراضي "شيرين قالتلي أنا قلبي طيب ومابيهونش عليا إن حد يتحبس سواء حسام أو غيره علشان كده اتنازلت".

وتابع "هي قررت تتكلم وقفلت خط الرجعة لحسام بنسبة كبيرة لكن وارد العودة من شيرين، ويا رب يقدرها وتكمل في خط البعد، وإنها تبعد عنه نهائي".

وأكمل "شيرين اتكلمت النهارده لأنه فاض بيها وبيجيلها رسائل تهديد وابتزاز، وقالت نصا لو أنا ماشية في الشارع وشجرة مالت عليا بيقولي الشجرة دي بتعاكسك وعايزة منك حاجة".

وأشار إلى أن "شيرين لجأت للإعلام لعله يكون منفذا للخروج من أزمتها، الناس زهقت من قصة شيرين وأنا مشفق على الناس وعلى شيرين لأنها صوت عظيم".