أرملة أشرف عبد الغفور: “كنا رايحين لريهام.. والمتهم كان سايق بجنون”

كشفت أرملة الفنان أشرف عبد الغفور، تفاصيل الحادث المروري الذي أودى بحياته 3 ديسمبر الماضي، وذلك خلال تحقيقات النيابة العامة.

وحصل “تليجراف مصر” على نص أقوال “فاطمة عبد الغفور” أرملة الفنان الراحل، خلال تحقيقات النيابة، وجاءت أقوالها كالتالي:

س: ما هى صلتك بالمتوفى إلى رحمة مولاه أشرف عبد الغفور عبدالجواد؟ 

ج : هو جوزي. 

س: ما هي تفصیلات حدوث إصابتك تحديدًا؟

ج: أنا كنت رايحه أنا وجوزى" الله يرحمه، عشان نزور بنتى ريهام، وكنا ماشيين على الطريق الدائري، عند كومبوند مونتن فيو، ومرة واحدة واحنا ماشين لقينا عربية خبطت في العربية بتاعتنا من ورا، و بعد كدة مرة واحدة اختل توازن العربية عشان اللى خبطنا كان جاى بسرعة جنونية، ومش فاكرة أي حاجة تانى لإني محستش بنفسي غير في المستشفى.

س: متی وأين حدث ذلك؟

ج : الكلام ده حصل أول امبارح حوالي الساعة ٥:٣٠ مساءً على الطريق الدائري.

س: وما سبب وقوع الحادث؟
ج : عشان فى عربية خبطت فينا من ورا، و بعدها اختل توازن عربية جوزي وعملنا الحادثة، والعربية بتاعتنا فضلت تلف حوالين نفسها.

س: و هل تسبب أحد في وقوع الحادث؟

ج : فى عربية خبطت فينا من ورا بسرعة جنونية.

س: وما هي السرعة التي كان يسير عليها آنذاك؟

ج : جوزي الله يرحمه كان ماشى على سرعة ٨٠ تقريبًا.

س: و ما هي حالة الضوء و الطريق آنذاك؟

ج : الإضاءة كانت كويسة لإننا كنا قبل المغرب.

س: و ما هي إصابتك تحديدًا؟

ج: أنا عندي كسر في ضلوع القفص الصدرى وكدمة شديدة في الرئة.

س: و هل أجريتي ثمة عمليات طبية لشخصك؟

ج:  لا أنا معملتش عمليات بس كنت فى العناية المركزة ولسة خارجة منها من شوية. 

س: و هل تتهمين أحدًا بالتسبب في حدوث الواقعة محل التحقيق؟

ج:  أيوه أنا بتهم اللى اتسبب فى الحادثة اللى خبط فينا من ورا.

س: وبم تتهمي المتسبب فى وقوع الحادث تحديدًا؟

ج: بتهمه إن هو المتسبب في حدوث إصابتي ووفاة جوزي.

س: و هل تشتبهين جنائيًا بالواقعة؟

ج:  لا هي الحادثة قضاء الله وقدره، بس اللي كان سايق العربية التانية كان جاي بسرعة جنونية.