شاهد على حادث أشرف عبد الغفور: "الشيفروليه كانت سريعة وبتاخد غرز"

واصلت النيابة العامة تحقيقاتها في واقعة وفاة الفنان أشرف عبد الغفور، في حادث سير بمدينة 6 أكتوبر، يوم 3 ديسمبر الماضي. 

واستمعت النيابة لأقوال “أ.م.ع”، حارس أمن بمنشأة قريبة من مكان الحادث، حيث استدعاه المحقق لغرفة التحقيق، وحلف الشاهد اليمين، ثم شرع في سؤاله، والتي جاءت كالتالي: 
س: ما تفصيلات شهادتك؟
ج: “وأنا قاعد يوم 3 ديسمبر لقيت عربية جايه من الطريق بسرعة، ودخلت في عربيه تانية من ورا ولقيت العربية اللي اتخبطت قعدت تلف في الطريق، حوالي 5 مرات، وجريت عليهم”. 

“العربية المخبوطة، كان فيها راجل سايق وست، كبار في السن، ولقيت الراجل اتحرك من مكانه، واتقلب على الكرسي اللي جمب السواق فوق الست، ونزلناه من العربية، وكان فاقد الوعي بس كان عايش وبيتنفس”. 

 “وفي نفس الوقت، الراجل اللي خبطهم، نزل من العربية وفضل قاعد لحد ما كان في مجيء ضابط من القسم، وبعدها لقيت الإسعاف جات وخدت الواد اللي خبطهم دا”. 

س: و ما مناسبة تواجدك بالمكان والزمان سالفي الذكر؟

ج: أنا شغال هناك.

س: و ما هي صلتك بالمتهم “مهند.أ”؟

ج: معرفهوش أصلا.

س: صف لي تحديدا كيفية وقوع الحادث؟

ج: الراجل اللي سايق العربية الشيفروليه أنا شايفه جاي من بعید وماشي بسرعة عالية، و كان بياخد "غُرز"، وعربية الراجل اللي مات ماشية على مهلها على اليمين. واللي خبطهم كان بياخد غُرز، ومرة واحدة اتفاجأ وملحقش يتفاداها. 

س: أي السيارتين هي المتسببة في الحادث تحديدا؟

ج: العربية الشيفورليه هي اللي خبطت الراجل من ورا. 

س:  وما هي سرعة السيارة المتسببة في الحادث؟
ج: كانت سرعته عاليه ميقلش عن 150 كيلو.

س: وما هي سرعة السيارة المتضررة من الحادث؟

ج : الراجل كان ماشي بالراحة في حدود 70 کيلو. 

س: و ما التصرف الذي بدر منك عقب إبصارك للحادث؟

ج: أول ما شوفتهم خبطوا في بعض روحت للعربية اللي اتخبطت أطمن على اللي جواها. 

س: وهل لحق بالمتوفى إلى رحمة مولاه أو من كان يرافقه ثمه إصابات جراء الحادث؟

ج: لا مشوفتش أي إصابات مكنش في حاجة، هو بس كان مغمى عليه والست كانت كويسة.

س: و ما هي حالتهم الحيوية آنذاك؟

 ج: الراجل كان مغمى عليه والست كانت متاخدة من الحادثة.

س: وهل حاول المتهم “مهند.أ” الفرار آنذاك؟

ج: لا. 

س: وهل من ثمة حوار دار بينك و بين المتهم؟

ج: اه. 

س: و ما مضمون ذلك الحوار؟

ج: أنا بعد ما شوفت الناس اللي اتخبطت روحتله، فابقوله الحادثة حصلت إزاي قالي أنا كنت جاي من بعيد بسرعة، وباخد غُرز، وملحقتش أتفادها فخبطت فيها.. 

س: هل تتهم أحدا بالتسبب في وفاه المتوفى إلى رحمة مولاه؟

ج: هو اللي خبطه السبب في موته بس مكنش قصده. 

س: وهل أجبرك أحد على الإدلاء بتلك الأقوال؟

ج: لا.