بعد إعلانه تدريس الأحياء.. "جيو ماجد" يضع صلاح أبو المجد في ورطة

أثار خبير التسويق صلاح أبو المجد، جدلًا واسعًا على "فيسبوك"، بعد سويعات قليلة من إثارته قصة خرافية حول رفض الإمام الشافعي الصلاة على أبو نواس.

چيو ماجد

ودون أبو المجد، منشورًا على صفحته الشخصية على "فيسبوك"، قال فيه، "مدرس الجولوجيا الخطير اللي اسمه (چيو ماجد) تأقلم على الوضع في ثانية.. وراح بعد ما الجولوجيا خرجت من المجموع قام محضر أحياء وبدأ ينزل لها فيديوهات شرح".
وأضاف أبو المجد، في منشوره، "طبعًا السوق مقلوب بسببه ومدرسين الأحياء بتهاجمه بمنتهى الغضب، بس أعتقد إنه خلال موسمين تلاتة بالكتير هيركب السوق بتاعه في المادة الجديدة".

براند جديد

وتابع أبو المجد: "السؤال اللي محيرني هنا بقى لو أنا مكانه اتخلى عن الاسم البراند بتاعي (چيو ماجد) عشان ده بيقول بصراحة إني بتاع جيولوجيا مش أحياء؟ وبدأ ببراند جديدة تماما؟، ولا أفضل بيها وأقبل عيوبها مقابل ميزة كون الاسم معروف؟، أيا ما كان اختياره، أتمنى له كل التوفيق".

التعليم في مصر

وتابع، "قبل ما تتخانق معايا على التخصص والجو ده خليك فاكر إن تقريبا كل مراحل التعليم في مصر أصبحت معتمدة على تدريس (آلية اجتياز الامتحان) وليس فهم المادة كمادة، شطارة چيو ماجد مش إنه جيولوجي شاطر، شطارته إنه مدرس شاطر والشاطر في التدريس يشرح أي حاجة".
وانهالت التعليقات على منشور صلاح أبو المجد، وانقسم المتابعون إلى فريقين، منهم من يرى أن كلامه منطقي، وآخرون يرون أن التخصص هو أساس النجاح.

تعليقات المتابعين

ودون حساب باسم محمود جمعة، تعليقًا على منشور صلاح أبو المجد، قال فيه، “معلش مع احترامى ليك يعنى إيه الشاطر في التدريس يشرح أي حاجة؟، يعنى دكتور في كلية طب وموهوب في شرح جزء العظام يروح عادي كده يدرس جراحة قلب علشان هو شاطر في شرح العظام؟ إزاي يعنى؟”.

وأضاف، “الحاجة الثانية أنا ملاحظ أن كل اللى عاجبك فى جيو ماجد أفندي، إنه اتجه شبه سيلز اللي هو بيسوق لنفسه في حاجة مش بتاعته أساسا، نفس أسلوب السيلز الرخيص أي سيلز يروح يشتغل في أي مجال علشان بس مجرد عنده لسان حتى معندوش موهبة البيع، أي حد بيعرف يخبط كلمتين ومبيبطلش رغي بقى سيلز وشاطر كمان”.

وتابع، “هي نفس الفكرة اللى عملها أخ ماجد دا، وعلى فكرة اللي عمله دا غلط في غلط مش علشان عمل حاجة بطريقة مختلفة خاصة بمجالك يبقى هو كده جاب الديب من ديله، يا سيدي من الآخر المنظومة كلها بلا استثناء فاشلة تمامًا.. وفشل ذريع”.

خريجو كلية العلوم

وعلقت سوسن زايد قائلة، “خريج علوم أيا كان قسمه لو ذاكر منهج واجتهد يقدر يدي Geology, biology, chemistry or even physics، طبعا كل ما كان في تخصصه هيبقي متمكن أكتر لكن هو مش بعيد عن مجاله ودي وجه نظري كخريجة علوم”.

مدرس الجيولوجيا

وكان ماجد إمام، الذي يصف نفسه بأنه أشهر مدرسي الجيولوجيا، أعلن تحديه لقرار وزارة التربية والتعليم بتغيير نظام الثانوية العامة وتقليل أهمية مادة الجيولوجيا، حيث لن تُضاف إلى المجموع الكلي للثانوية العامة.

وفي مقطع فيديو نشره على صفحته الشخصية على فيسبوك، أكد "إمام" أنه كان من أشهر وأنجح معلمي الدروس الخصوصية في مصر، ولن يقف مكتوف الأيدي أمام هذا القرار، وبدلًا من ذلك، أعلن أنه سيتجه لتدريس مادة الأحياء لطلاب الصف الثالث الثانوي، وسيكون الحجز عنده بالأولوية ولمدة 24 ساعة فقط.