أقوال المتهم الأول في قضية "سحر مؤمن زكريا".. نص التحقيق (خاص)

تتواصل أصداء حادثة "فبركة" العمل السفلي للاعب الأهلي السابق مؤمن زكريا، التي وقعت في مقابر الإمام الشافعي بالخليفة، بعد أن حصلت "تليجراف مصر" على نص التحقيقات في القضية.

وفيما يلي أقوال المتهم رمضان، الذي ادعى اكتشاف السحر في المقابر:

س: ما الذي حدث وما هي ظروف ضبطك؟

ج: اللي حصل إنى شغال في مقابر سيدي عقبة في الخليفة، وفي يوم كنت بزرع صبارة وعندما حفرت اكتشفت كيس بلاستيك، فتحته لأرى ما بداخله، ووجدت لفتين، الأولى تحتوي على طلاسم غير مفهومة، والثانية بها ثلاث ورقات بيضاء مكتوب عليها كلمات غير واضحة وصورة لكابتن مؤمن زكريا، كانت الصورة مثبتة بدبابيس وكُتب عليها باللون الأحمر، حينها، صورتها باستخدام هاتف محمد، زوج أختي.

اتصلت بمحمد إمام قريبي وقلت له على اللي أنا شوفته وساعتها هو قال لي إنه يعرف حد يوصلني بكابتن مؤمن زكريا، وبعد كدا لقيت واحد اسمه مصطفى ومعاه واحد صاحبه وقال لي إنه قریب مرات مؤمن زكريا وساعتها طلب مني إنه يشوف الأعمال اللي أنا شوفتها في المدفن وأنا وريتها له، وقال لي إن زوجة مؤمن زكريا هتتواصل معايا وبعدها بيومين لقيت كابتن مؤمن زكريا واتنين شيوخ وأبو مؤمن زكريا ومصطفى وساعتها الشيوخ طلبت مني أجيب الأعمال عشان يشوفوها وبعدها قعدوا يطلبوا مني خل ومياه وسلطانية على أساس إنهم بيفكوا الأعمال وبعد كدا طلبوا مني إنهم يشوفوا المكان اللي أنا لقيت فيه الكيس ده وريته لهم، والشيخ طلب مني أحفر شوية كمان وطلع ساعتها من الحفرة اللي جنب التربة حتتين فخار وسلك.

بعد كده حط زرعة الصبار وسقاها بمياه مقري عليها قرآن، وبعد كدا هما مشيوا ولقيت محمد عمر بيقول لي إنه صورنا واحنا بنفك العمل وساعتها أنا طلبت منه إنه يسمح أى حاجة صورها عشان ما ينفعش نتاجر بمرض حد وبعدين تاني يوم وأنا رايح أجيب علاج من الصيدلية، لقيت الصيدلي بيقول لي إيه موضوع مؤمن زكريا قولت له إنه كان في أعمال ليه في الترب وفيه شيخ جيه فكها وساعتها الصيدلي بيقول لى أنا مصدقك وساعتها روحت طلعت له الصور اللي كنت مصورها للأعمال والدكتور ساعتها طلب مني إن أبعت له الصور فبعتها له بحسن نية وبعد كدا لقيت حد بيتصل بيا وبيقول لي إن هو جاري وبيسألني على موضوع مؤمن زكريا فحكيت له وبعدها على طول لقيت المكالمة اللى كانت بيني وبين الراجل ده انتشرت.

ويوم السبت اللي فات لقيت أحمد الكردي رئيس المباحث بيتصل بيا وبيقول لي أنا عند البيت عندك وعاوزك تيجي لي حالا وفعلا أنا روحت له عند البيت وقال لي إيه يا عم اللى انت عامله ده قولت له أنا معلمتش حاجة وطلب مني إنى أوري له مكان الحفرة اللي كان فيه الأعمال وريتها له وحكيت له على كل اللي حصل وبعد كدا راح أخدني وركبني ميكروباص وطلعنا على قسم الخليفة، وفي القسم طلعت وحدة المباحث وفضلت قاعد في المباحث لحد النهاردة الفجر وبعد كده لقيتهم نزلوني الحجز والنهاردة جابوني على النيابة وهو دا كل اللي حصل.

س: متى وأين تم ضبطك تحديدًا؟

ج: الكلام دا حصل يوم السبت اللى فات بتاريخ 2024/9/28 الساعة 8 مساء عند بيتى في شارع سيدي عقبة بالإمام الشافعي الخليفة.

واقعة سحر مؤمن زكريا

وفي وقت سابق كشف محضر تحريات الأجهزة الأمنية تفاصيل جديدة حول واقعة مؤمن زكريا، المزعومة بشأن العثور على أعمال سحرية للنيل منه داخل إحدى المقابر بمنطقة الخليفة في القاهرة.

واختلق القصة 5 أشخاص من أجل تصويرها وبثها على بعض مواقع التواصل الإجتماعي بهدف التربح منها، فيما تباشر جهات التحقيق، تحقيقاتها الموسعة مع خمس متهمين مقيمين بمنطقة الخليفة، وهم: “رمضان.م.ع” (تُربي)، و"محمد.ع.ع.أ"، و“أمنية.ك.م”، و"محمد.أ.م" (موظف)، و"حكيم.ر.م"، لسماع أقوالهم.

تورط صاحب استديو تصوير

ووفقًا لما جاء بمحضر التحريات التي حصل عليه “تليجراف مصر”، على تفاصيلها، فإن المدعو “رمضان.م.ع” أحضر مجموعة من الأوراق، ثم كتب طلاسم عليها، وكذا دُمية من القماش بها دبابيس، ووضع كل ذلك داخل كيس بلاستيك. فيما طبع كل من “أمنية.ك.م”، و“حكيم.ر.م” مجموعة من الصور الخاصة بلاعب الأهلي السابق عن طريق استديو تصوير يملكه مصور يُدعى “م.ح”.

استخراج العمل المدفون

ووفق التحريات، اشترك “محمد.ع.ع”، و“حكيم.ر.م” في الحفر وتصوير فيديو في أثناء استخراج العمل المدفون داخل الأرض، وأثناء عملية إبطاله المزعومة، بقصد ابتزاز اللاعب واستغلال ظروفه المرضية وإيهامه بوجود سحر، وأن سبب مرضه هو السحر بقصد ابتزازه والنصب عليه بمبالغ مالية، وتحقيق أكبر استفاده من ذلك عن تحقيق أعلى نسبة مشاهدة عبر مواقع التواصل الاجتماعي.

وأخبر المتهم الرابع “محمد.أ.م” أهل المجني عليه بما تم اكتشافه واستخراجه تمهيدًا لابتزازه بالمبالغ المالية نظير ما عثروا عليه وفك السحر المستخدم ضده.

وكان مؤمن زكريا، قد وصل إلى مقر النيابة العامة بمحكمة زينهم، لسماع أقواله في اتهام “تربي” و3 آخرين، بفبركة العثور على أعمال سحر تخصه داخل المقابر.

وتجري النيابة العامة بالخليفة، اليوم، التحقيق مع “تربي” و3 أشخاص آخرين، على خلفية اتهامهم بفبركة واقعة العثور على أعمال سحر تخص لاعب الأهلي السابق مؤمن زكريا.

تحريات الأجهزة الأمنية

وكشفت تحريات مباحث القاهرة في واقعة القبض على تربي ونجله وزوجته واثنين آخرين، بتهمة “فبركة” السحر للاعب الأهلي السابق؛ أن المتهم الأول كان يبحث عن التريند.

ووفق التحريات؛ اتفق المتهم مع آخرين على فبركة صورة لمؤمن زكريا ووضع دُمية وطلاسم غير مفهومة في المقابر، ثم تواصلوا مع أحد المقربين للأخير، وحضر اللاعب بالفعل لفك تلك الأعمال دون معرفته أنها واقعة مختلقة “مُفبركة”.

التحريات في واقعة سحر مؤمن زكريا

وبحسب التحريات، فالمتهم حصل على صورة مؤمن زكريا، من شخص مقرب، و"فبركة" القصة لهثًا وراء التريند.

ورجحت التحريات الأولية، اختلاق التربي وأسرته الواقعة، ووضع الطلاسم ودمية وأعمال سحر متعلقة بالموت والمرض داخل المقابر ثم استدعوا مؤمن زكريا.