"10 فويسات".. مفاجأة بتحقيقات المتهم الأول في قضية ممرض المنيا (خاص)

حصل “تليجراف مصر”، على نص التحقيقات مع المتهم الأول في واقعة مقتل ممرض المنيا، مينا موسى، داخل شقة رجل مسن في منطقة الزاوية الحمراء بالقاهرة.

وجاءت أقوال المتهم الأول الذي يعمل ممرضًا يتولى رعاية رجل مسن بمنزله على النحو التالي:

س: ما اسمك؟ وما طبيعة علاقتك بالمجني عليه؟

ج: اسمي إبراهيم وعندي 41 سنة، بشتغل ممرض، ومعرفش مينا ولا بينا أصحاب مشتركين، وأنا رنيت عليه من شهر أبريل اللي فات، وطلبت منه يقابلني وقلت له إني جايب له وظيفة ممرض، وكان في دماغي وقتها إني أخطفه وأطلب فدية لأني مزنوق في 120 ألف جنيه وعليّا ديون.

س: وماذا كان رده على طلبك؟

ج: رفض في البداية، لكن أنا صممت أنه يجي وقلت له إنه شخص هادي وشاطر وعشان كدا الراجل المسن دا هيكرمه وهيديه مرتب كويس.

س: أين تقابلت مع المجني عليه؟

ج: قابلته في الزاوية الحمراء وطلعنا أنا وهو ومصطفى صاحبي شقة راجل مسن أنا بشتغل عنده بقالي سنتين ونص وهو مريض “ألزهايمر” وواثق إنه هينسى كل اللي حصل قدامه.

س: ماذا حدث داخل الشقة؟ وهل المريض له علاقة بالمجني عليه؟

ج: الراجل مايعرفش مينا، ودخلناه الأوضة يشوفه عشان يطمئن، وبعدها قفلنا عليه الباب وروحت أقفل باب الشقة، بس أول ما تربست الباب مينا حس بخطر وحاول يضربني، وأنا كنت بدافع عن نفسي وضربته ووقعته على الأرض، وأخدت منه تليفونه ومحفظته وخليته يسجل 10 فويسات بصوته.

س: لماذا احتفظت بتسجيلات صوتية للمجني عليه؟

ج: عشان أخلي أهله متطمئنين إنه عايش وكويس لحد ما آخد فلوسي.

وأضاف المتهم خلال التحقيقات: مصطفى صاحبي سابني معاه وراح يجيب إيصالات أمانة عشان نمضي مينا عليها، وهو برا مينا اتهجم عليّا وفضل يزعق بصوت عالٍ، وخُوفت نتفضح فدخلت المطبخ جبت ماسورة حديد وضربته بها على دماغه من ورا عند قفاه عشان عارف إني لو ضربته هنا هيفقد الوعي بس هو مات.. ومكنتش عاوز أموته.

وأضاف المتهم في اعترافاته بالتحقيقات: لما حسيت إن مينا مات كلمت مصطفى يجيلي بسرعة يلحقني ونتصرف، ولما جه مصطفى قال لي: إحنا كدا هنتفضح ولازم نخفي جثته، فجرجرناه لحد الحمّام وقطعناه لأجزاء وحطيناه في شنط كتيرة ونضفنا البيت ورمينا شنط في ترعة الإسماعيلية والباقي وزعناه في أكوام الزبالة في المنطقة.