قتل صاحب قهوة أسوان بمصر الجديدة.. القصة من لسان "المتهم"

حصل "تليجراف مصر"، على نص التحقيقات في واقعة مقتل نجل صاحب مقهى أسوان بمنطقة مصر الجديدة، التابعة لمحافظة القاهرة. 

وأدلى المتهم “ناصر، ص”، حاصل على بكالوريوس نظم ومعلومات إدارية، بأقواله في القضية المتهم فيها بقتل محمد عبد الرازق، أمام جهات التحقيق. 

س: ما تفصيلات إقرارك؟

ج: “فيه خلافات بيني وبين محمد عبد الرازق، ومن حوالي خمس سنين حصلت بينا مشكلة، واتخانقا مع بعض وضربنا بعض وبعدها الناس جت فضت بنا والموضوع خلص، هو كان واخد حصة في العمارة اللي محل العصير بتاعي فيها، في شارع المسلة بالكوربة”.

 قال، “مكنتش عايز يكون ليه حصة في العمارة، وكان فيه قضايا كتير بينا وبين صاحب العمارة، ولما كنا بنشوف بعض كان بيحصل ساعات مشادات لكن الناس كانت بتحوش والموضوع يخلص، وآخر مشكلة كان هو جاي يزعق ويشتم من عند قهوة أسوان بتاعته، ولقيته جاي يزعق عند محل العصير بتاعي”.

أضاف المتهم، “قربت منه وطلعت المطوة من جيبي وضربته بيها أكتر من ضربة، ووقع على الأرض، ومحستش بنفسي لقيتني عمال (أغز) المطوة في بطنه، والناس قعدت تحوش وأنا مكنتش عايز اسيبه، فضلت أضرب فيه لحدما الناس ضربوا فيا بالكراسي عشأن أقوم من عليه”.

تابع، “فضلت أضرب فيه بالمطوة وبعدها قولتله انت اللى وصلتني إني أعمل فيك كدا، وبعدها الناس قومتني من عليه وأنا رميت المطوة ودخلت محل العصير تاني، وبعد كده في 2 أمناء شرطة خدوني على قسم مصر الجديدة، و فتشوني هناك كان معايا مفاتيح البيت بس وبعدين دخلوني، وعملوا محضر بكل اللي حصل”.

س: متى و أين حدث ذلك؟

ج: 2024/10/20 الساعة 12:30 مساء في شارع المسلة في الكوربة بمصر الجديدة.

س: ماسبب ومناسبة تواجدك بالزمان والمكان سالفي الذكر؟

ج: كنت قاعد في محل العصير بتاعى اللي اسمه جنة الفواكه.

س: وما ظروف نشأتك تحديدا؟

ج: مواليد 1996، أبويا متوفى وأمي موجودة، عندي أربع اخوات ولاد، وأنا أعزب.

س: وما المؤهلات العلمية التي حصلت عليها؟

ج: معايا بكالوريوس نظم ومعلومات إدارية ومتخرج سنة 2014.

س: وما وسيلة تعايشك؟

ج: أنا وأخواتي ملاك محل العصير، وليه فروع كتير في مصر، وده مصدر رزقي الوحيد.

س: وما حالتك الاجتماعية؟

ج: أعزب.

س: وما علاقتك بالمجني عليه محمد عبد الرازق؟

ج: علاقي بيه إنه جاري، هو أكبر مني في السن ومتليش علاقة بيه قوي.

تفاصيل مقتل صاحب محل عصير

وكانت أجهزة الأمن بوزارة الداخلية، كشفت ملابسات تداول مقطع فيديو على عدد من المواقع الإخبارية ومواقع التواصل الاجتماعي يتضمن اعتداء شخص على آخر بسلاح أبيض في منطقة مصر الجديدة بالقاهرة، ما أدى إلى وفاته.

وبالفحص، تبيّن أنه بتاريخ 30 أكتوبر الماضي، نشبت مشاجرة بدائرة قسم شرطة مصر الجديدة بين مالك محل عصائر بأحد العقارات، وشريك بمقهى بذات العقار “متوفى”، بسبب خلافات بينهما حول رغبة المتوفى في طرد الأول من المحل المشار إليه، بدعوى ملكيته لحصة بالعقار وشرائه الشقة التي تعلو المحل الخاص به.

وعلى إثر تلك المشاجرة قام المتهم الأول بالتعدي عليه بسلاح أبيض محدثًا إصابته التي أدت إلى وفاته، كما ضبط مرتكب الواقعة في حينه وعرضه على النيابة العامة، التي قررت حبسه على ذمة التحقيقات.