ميدو عن عدم تشجيعه للأهلي: "مفيش حاجة تستاهل إنك تبقى منافق"

علق أحمد حسام ميدو نجم الزمالك والكرة المصرية، عن الأزمة التي تسبب فيها، بعد تصريحاته بعدم تشجيع النادي الأهلي، في كأس العالم للأندية 2025، مما أثار الجدل لدى الشارع المصري، وخاصة جماهير القلعة الحمراء، حيث كان من المفترض أن يتحدث بحيادية دون إظهار انتمائه، بسبب تواجده في أحد المنابر الإعلامية.

وأكد ميدو أن ارتباطه بنادي الزمالك غير عادي، فهو يعتبر نفسه من مشجعي “التالتة يمين”، المدرج الأبرز لجماهير الأبيض في الملاعب المصرية خاصة في ستاد القاهرة.

ميدو يعتذر لـ الأهلي

واعتذر ميدو عن تصريحاته ضد النادي الأهلي، كاشفًا بأن الوقت لم يكن مناسبا وهو ما أحدث حالة من الغضب، خاصة لجماهير القلعة الحمراء. 

ونشر ميدو بيانا عبر حسابه الرسمي على موقع التواصل الاجتماعي “إكس”، لتوضيح تصريحاته عن النادي الأهلي، ورده على السؤال الذي تم طرحه له خلال تواجده بأحد الأستوديوهات التحليلية.

"أنا ابن الزمالك أكبر فخر ليا"

وقال ميدو: "أنا ابن الزمالك وأكبر فخر ليا في حياتي إني ابن المدرج ابن الثالثة يمين بلعب في الزمالك من وأنا عندي 9 سنين وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك بطاقتي وأنا عيل صغير هي كارنيه اتحاد الكورة اللي مكتوب عليه اسم الزمالك". 

"اتربيت إني احترم المنافس"

وأضاف ميدو: " تتلمذت على أيدي مدربين عظماء علموني إني أنتمي لفريقي بس وما أشجعش أي نادي ثاني في مصر بالذات، إلا نادي الزمالك أيا كان بيلاعب مين ولكن في نفس الوقت اتربيت إني احترم كل المنافسين وأهنيهم لو كسبوا وأباركلهم وأقولهم هارد لك لو خسروا". 

"مفيش حاجة تستاهل إنك تبقى منافق"

وتابع: "هو ده معنى الروح الرياضية بالنسبة لي!! لما اتسألت في الإستوديو هتشجع الأهلي في كأس العالم للأندية، رديت بطبيعتي دون أي نفاق او كذب لأن بكل بساطة مفيش حاجة في الدنيا تستاهل إنك تكون كذاب ومنافق! اتفق معاكم إن التوقيت مكانش مناسب وبعتذر لأي حد زعل إني قلت الكلام ده في حدث مهم يخص النادي الأهلي وأنا شايف الناس اللي زعلت بخصوص إن الوقت مش مناسب عندهم كل الحق.. أما لو اتسألت مليون مرة هتشجع أي نادي تاني في مصر غير الزمالك، إجابتي هتكون هي هي عمرها ما هتتغير لغاية لما أموت". 

"مش هرد على أي حد هاجمني" 

وواصل:" أما بخصوص الهجوم اللي بتعرضله فأنا عاذر الناس لأنهم ممكن يكونوا اتعودوا على إجابات مختلفة في السنوات الأخيرة من ناس تصدروا المشهد في الاعلام وهما أكتر ناس بيأذوا المنافس في الخفاء وأكتر ناس بتتمنى من قلبها خسارة المنافس من جواهم.. مش هرد على أي حد هاجمني لأن بكل بساطة أنا في مرحلة في حياتي شايف إن مفيش حاجة في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبة لي ماتتعداش أكتر من كده!! مرة ثانية بعتذر إني كنت سبب في جدال قائم الأيام اللي فاتت للأسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدا عقلية مشجع الكورة!!".