بسمة وهبة لـ عمر زهران: "مصر كلها بتدعيلك.. اصبر يا حبيبي"

طالبت الإعلامية بسمة وهبة، متابعيها بالدعاء للمخرج عمر زهران قبل ساعات من محاكمته اليوم الثلاثاء، في التهم الموجهة إليه بالاستيلاء على مشغولات ذهبية مملوكة للفنانة التشكيلية شاليمار شربتلي، زوجة المخرج خالد يوسف. 

وقالت بسمة وهبة، في فيديو لها عبر حسابها الرسمي بموقع إنستجرام: “بعد كام ساعة هنكون في محاكمة عمر زهران والساعة الآن 2 ونص في ثلث الليل الأخير إللي ممكن ندعي فيه ربنا ونصلي ركعتين قيام ونقول لربنا انصر عمر زهران”.

وأضافت الإعلامية بسمة وهبة، "شخص كبير في السن عاش بكرامته وأخلاقياته طوال حياته ويقال عليه إنه سارق في النهاية يطلع حرامي ويتم وضع الكلابشات في يديه.. أنا مبنامش الليل وتعبانة بسبب إللي حصل”.

وواصلت: “أنا مستبشرة خير لأن هيئة الدفاع طلبت تفريغ مكالمات عمر زهران لأن براءة عمر زهران في هذه التفريغات وأتمنى ده يكون من نقاط هيئة الدفاع". 

وجهت بسمة وهبة، الشكر إلى المستشار مرتضى منصور بسبب قبوله الدفاع عن زهران متابعة “في الحقيقة المستشار مرتضى ميعرفش عمر زهران لكنه قبل قضيته جدعنة أنا ممكن أكون مبتكلمش معاك، بس بشكرك أنت راجل طيب كفاية إنك بتحاول تنقذ معانا أبونا وأخونا عمر”.

وتساءلت، "ليه حاسين إن الموضوع شخصي؟ متابعة: “مفيش حد ينتقم ويتخذ هذا المنهج ويكون ده رد فعله إلا لو فيه مشكلة والله أعلم إيه تفاصيلها مش حابة أتكلم فيها لأن دي أسرار بيوت”.

وأردفت “اللي عارف نفسه، بطل تلف على الناس لأن المصري لا يباع ولا يشترى، وأنا عارفة أنت بتروح لمين وكل الناس اللي لفيت عليهم وعرضت عليهم.. أنت شغال إيه؟ شغال صبي ولا إيه؟ ولا نسيت نفسك أنت بتشتغل إيه صبي؟".

واستطردت “ربنا هيورينا فيك يوم أسود لأنك ظالم وملوث وفاسق وكمان الأخت اللي معاك مطلعة إشاعة إنها ضامنة النتيجة، بعينك إنتي ياريتك تيجي تحضري المحاكمة وحضرتك مطلوبة من الإنتربول”.

وتابعت “كل الناس اللى بتدعي إنها بتستقوي بيهم لا ليهم علاقة بيها ومتملصين منها”.

ووجهت حديثها إلى المخرج عمر زهران: "مصر كلها بتدعيلك يا عمر زهران اللي يعرفك واللي ميعرفكش وده دليل إن ربنا راضي عنك ومهما كان الحكم والتأثير والأدلة الباطلة دي الأرض لكن كلمة السماء ربنا مقالهاش ومش لازم يقولها بكرة يا عمر". 

وتابعت “اصبر يا حبيبي علشان خاطري، صحتك متتحملش وهينولك خير كبير على الصبر على البلاء والابتلاء والظلم”.

وأضافت “كل الناس اللي بتسمعني أستحلفكم بالله، المسلمين ادعوا له في صلاة الفجر والمسيحيين ولعوله شمعة أرجوكم عمر عمره ما أساء لحد ميختلفش عليه اتنين في مصر.. يا رب يا عمر يديلك الصحة وأشوفك زي أول يوم شوفتك فيه كنت مفعم بالنشاط والسعادة  وأشوفك زي الفراشة”. 

وأشارت إلى أن المستشار مرتضى منصور، يحضر مفاجآت أثناء المحاكمة تثبت براءة عمر زهران، متابعة “ربنا يخليهولك في أولادك والمستشار محمد حمودة منتظرين التاتش الجميل بتاعك”.