شقيقه سرق منه منزله.. كيف كان رد مسن "في دقيقتين" أمام الكعبة؟

أثار فيديو لمعتمر مصري خلال أدائه لمناسك العمرة بالحرم المكي، تفاعلًا واسعًا بين رواد منصات التواصل الاجتماعي، إذ ظهر على خلاف مع شقيقه الذي أوقع عليه مظلمة كبيرة، إلا أنه رفض الدعاء عليه.

مسن يرفض الدعاء على شقيقه في الكعبة رغم ظلمه

ووفقًا للفيديو المتداول فظهر المسن بملابس الإحرام، وخلفه الكعبة الشريفة وسط جموع المعتمرين، في فيديو لم يتخطى الدقيقتين، ليشير إلى الكعبة خلفه ويوجه رسالة مؤثرة لشقيقه، الذي اتضح أنه سرق منه منزله باستخدام توكيل، أجراه الأول له لاغترابه عن البلاد، وبرر الشقيق سرقته تلك فيما بعد أمام الناس بشرائه المنزل بأمواله الخاصة.

فيما وجه المسن رسالته لأخيه قائلًا: "شايف يا أخويا شايف الناس دي كلها، جاية تغسل نفسها من الذنوب، انتَ بتحمل على رأسك ذنوب، إنتَ خذلت الأمانة، وخدت بيتي ومدوخني في بلاد العالم، عايز أرجع بلدي مش عارف".

رفض الدعاء عليه رغم مظلمته

ورغم الفرصة التي جاءت للشقيق المظلوم على طبق من ذهب ليقتص من مظلمته، إلا أنه آثر الدعاء مضيفًا: "أنا مش هدعي عليك في المكان ده، أنا هدعيلك الله يصلحك، الله يعين الغشاوة اللي على عنيك".

ليتابع بكلمات مرتعشة: "إنتَ ظلمتني وسرقت بيتي بالتوكيل، إنتَ كنت شاطر وخدت البيت، بس لو إنتَ شاطر متموتش، علشان أنا إن شاء الله هموت وإن شاء الله هنتظرك على الصراط المستقيم، لو إنتَ قادر تحارب ربك حاربه، قوله أي قصة، ربك مطلّع وعارف كل حاجة، ابقى قوله أصل أنا اللي شاريه".

وواصل المسن رسالته، وقد غلبه لين القلب رأفة على وضع أخيه، رغم تجبره في ظلمه، مستجديًا إياه أن يراجع عن أفعاله، خوفًا عليه من قرب الأجل وعقاب النار وحساب يوم القيامة.

واستأنف: "يا أخويا أنا خايف عليك من جهنم، جهنم محدش يستحملها، الرسول نفسه كان بيستعيذ بالله منها، لا حرها يتقبل ولا بردها يتقبل، أنا خايف عليك من جهنم، أنا بدعيلك الله يشيل الغشاوة اللي على عنيك، الله يرجعلك بصيرتك، الله يعافيك من أي شر".

واختتم بأسى يغلف كلماته: "إلحق نفسك يا أخويا إلحق نفسك أنا وإنت بقينا قريبين من القبر، هقفلك إن شاء الله على الصراط المستقيم، مش هسامحك ولا عيالي هيسامحوك، أنا هسيبك منك لله، أنا نقلت المُلك كله لربنا، وإنت لربنا.. إن شاء الله هاخد حقي عند ربنا".