"جاي تتمنظر قدام صحابك".. شقيق أنوسة كوتة يهاجم عامل السيرك المصاب

خرج شقيق مدربة الأسود وأرملة الملحن محمد رحيم، أنوسة كوتة، ليدافع عنها بعد الاتهامات الموجهة إليها بعد بتر ذراع مساعدها، إثر تعرضه لهجوم من النمر في سيرك طنطا.

دفاع شقيق أنوسة كوتة

ونشرت أنوسة كوتة، فيديو لشقيقها وهو يدافع عنها عبر صفحتها على فيسبوك، اتهم فيه عامل السيرك المصاب، محمد إبراهيم عبدالفتاح بسطاويسي، بالإهمال ومحاولة التباهي أمام أصدقائه التي كادت أن تفقده حياته، كون توثيق وربط الحيوانات ليس من مهام وظيفته.

وقال شقيق أنوسة: ”مبروك الترند يا بسطاويسي، كنت هتضيع المدربة والجمهور كله بسبب أنك بتتمنظر، مبسوط، وبعدين بتقول إن الحيوانات دي مكلتش من 10 رمضان، يعني من 25 يوم، يعني الأولى يأكلو إيدك إنت اللي برا القفص ولا المدربة نفسها اللي جوه القفص ومقفول عليها؟، أنت جاي تتمنظر قدام صحابك على حيوانات متعرفكش! مستني منهم إيه".

وتابع شقيق أنوسة، أنه ليس من اللائق أن تقول إن المدربة لم تهتم بك رغم أنها اصطحبتك إلى المستشفى فور إصابتك بملابس عملها، موضحًا: "ولا أنت جامد أوي وروحت لوحدك المستشفى، وبعدين هي اتسحبت لـ النيابة وقعدت حوالي 8 أو 10 ساعات هناك، شوف هي كانت بتعمل إيه عشان تحميك وتحمي الناس اللي موجودة كلهم، طب أنت عندك علم إنها كلمت عيلتها كلها علشان يجوا يقفوا معاك”.

تفريغ الكاميرات

واختتم شقيقها حديثه: “أبقى اتفرج هي عملت إيه لما النمر هجم على إيدك، وشوف في كام أسد نزل على الأرض وهي مدياهم ضهرها، هي كان ممكن تضيع في ثانية، ولما عم شعبان دخل دي كارثة، لأن أنوسة بقى عليها 3 مسؤوليات أنها تفك النمر اللي هجم على إيدك، وتحمي عم شعبان، وتأمن إن مفيش حيوان يخرج برا القفص، إحنا كده محتاجين نفرغ الكاميرات”.

أنوسة كوتة

وفي وقت سابق، قالت مدربة الأسود أنوسة كوتة، إنها كانت متواجدة داخل القفص، من أجل إقامة أحد العروض، داخل سيرك بمنطقة المعرض بمدينة طنطا، مشيرة إلى أن المصاب أحد أفراد طاقم العمل ويعمل مساعدا، ويُدعى محمد.

وأضافت عبر مقطع مصور على مواقع التواصل الاجتماعي، أن ما حدث هو خطأ فني، بسبب قيام المساعد بإدخال يده إلى القفص أثناء العرض

وأوضحت أن النمر سوف يتم إخراجه من القفص لإعادة تأهيله مرة أخرى في القاهرة، لافتة إلى أن النمر سوف يتم إبعاده عن العروض.

وأكدت أنه لا توجد أية إصابات بين الجمهور، وأنها متواجدة داخل المستشفى للاطمئنان على العامل المصاب.