"أبكى والدها".. هند سعيد صالح تكشف موقفًا إنسانيًا مع سامح عبد العزيز

شاركت الفنانة والمونتيرة هند سعيد صالح، ابنة الفنان الراحل سعيد صالح، متابعيها تجربة إنسانية مؤثرة مع المخرج الراحل سامح عبدالعزيز أثناء عملها معه كمونتير مساعد في فيلم “الفرح”، مشيرة إلى أنه كان داعمًا حقيقيًا لها.

موقف إنساني مع سامح عبد العزيز

وكتبت هند صالح منشورًا عبر حسابها على موقع “فيسبوك” قالت فيه نصًا: “سامح عبد العزيز دخل عليا مرة المونتاچ فى فيلم الفرح كنت مونتير مساعد لصديقى المونتير عمرو عاصم”.

وتابعت صالح: “قاعدة مركزة وبشتغل وأنا لما بشتغل بتركيز بتخض لما حد يعطس جنبى فتح باب وحدة المونتاچ فتحة مخبرين وقالى: يا سلطانة (هو كان مسمينى كدة عشان الكليب الشرقى الشهير اللى عملته) مدام إسعاد جاية تتفرج النهارده على الفيلم عشان التوزيع قولتله جاهزين يا أستاذ لا تقلق كله تحت السيطرة و مجهزالها التايم لاين قالى لا تايم لاين إيه؟ أنا عايزها تتفرج لحد قبل ما زينهم (خالد الصاوى) يقول ياريتنى ما كنت سمعت كلامكم”.

واستكملت هند صالح: “قولتله حاضر بس ليه الساسبنس ده؟ قالى مش عارف أهى فكرة و جاتلى وهانقفل عند الآية القرآنية وخليها تتفاجئ بالنهاية الحقيقية فى العرض الخاص وقفلت عند الجزء اللى طلبه وشيلت النهاية الحقيقية فى تايم لاين تانى لحد ما الضيوف يمشوا.. كان كل شوية يقلد بابا فى مشهد (بركة السبع جت؟) ويفتح عليا باب الوحدة و يقولى: مدام إسعاد جت؟ ومدام إسعاد يونس جت واتفرجت وعجبها الفيلم وقالت فيه أشعار وهو واقف من وراها عمال يغمزلى ويضحك”.

على كرسي متحرك.. بسمة وهبة تعزي أسرة سامح عبد العزيز بالمستشفى

كيف تعامل سامح عبد العزيز عندما علم أنه في قناة إسرائيلية؟

مفاجأة في فيلم الفرح

وأضافت: "لما الناس مشيت قالى عندى ليكى مفاجأة قولتله خير؟ قالي في العرض الخاص هاتعرفيها، اكتشفت إنه كان كاتب اسمى فى لوحة لوحدي فى تتر البداية تقديرًا لمجهودي لأن الفيلم فعلًا كان تركيبه صعب، طبعًا فرحتي كانت أكبر من أي فرحة لأن بابا وهو بيشوف اسم بنته فى العرض الخاص لفيلم مهم زي ده كانت كبيرة لدرجة البكاء ده غير لإنه فى 2009 مكانش فيه مساعدين بيتكتبوا فى تتر البداية واللى فى الوسط هايفهم قصدي".

واختتمت هند سعيد صالح منشورها: "دي حاجة بسيطة أوي من مواقف وقف فيها سامح عبد العزيز معايا من غير ما أطلب، شكرًا يا سامح.. ربنا يرحمك و يغفرلك ويجعل الليلة أجمل لياليك ويرزقك الجنة".

وفاة المخرج سامح عبدالعزيز

قبل وفاة المخرج سامح عبدالعزيز، دخل في غيبوبة منذ يوم الجمعة الماضي، حيث تأثر ضغط الدم والرئة بسبب الفيروس الذي عانى منه في أيامه الأخيرة نتيجة ارتفاع نسبة السكر، وظل هكذا حتى وافته المنية صباح اليوم.